California Ug Alcords nagsawo sa liderato

CEBU, Philippines - Parehong gibuntog sa California quintet ni playing coach Rodi Cabigas ug Alcords team ni skipper Marlon “El Presidente” Reyes ang tagsa-tagsa nila ka kaatbang kaniadtong Sabado aron magsawo sa liderato sa 2-1 nga baraha atol sa pagtapos sa first round of elimination sa nagpadayong Vintage Basketball Club (VBC) basketball tournament didto sa barangay Pooc Sports Complex sa dakbayan sa Talisay.

Sa primerong duwa, gipanitan sa Alcords ang Vintage sa iskor, 92-60 samtang naka-ipsot ang California batok sa Beer Gins ni Flor Yosores sa iskor, 66-59.

Ang Alcords maoy kanunay naglabaw sulod sa 40 minutos nga kumbate diin mibahug ang three-point artist nga si Cesar Alcordo ug game-high 31 puntos uban sa pito ka three-point shots.

Si Ricboy Nacario midugang og 16 puntos sa nag-aso asong kadaugan.

Sila si Julius guba ug Winston Gerali maoy nangu sa Vintage sa ilang 15 ug 12 puntos matag usa.

Sa laing bahin, nakalabaw unta ang Beer Gins sa sayong bahin sa duwa pinaagi sa sagunsin nga 10 puntos ni Jonas Lastimosa apan dali kaayong nasakmit sa California ang labaw tungod sa kahugot sa ilang depensa.

Human mailog sa California ang labaw sa halftime, 29-28, sila na kanunay maoy naglabaw ug naglabaw gihapon sila’g siete puntos pagsugod sa fourth period, 51-44.

Nagtabla sa makadaghan ug nagpuli-puli sab og labaw ang duha ka habig halos sa kinatibuk-ang fourth quarter hangtod nga nakamaneho ug krusyal nga fast-breaking lay-up si Mar Torres aron tablahon ang iskor sa 59 nga maoy kataposang deadlock sa duwa, may 1:15 ang nahibiling oras.

Wala madugay, gipakita ni Cabigas ang iyang liderato dihang nakig-kumboya siya ni Roy Jumag ug Torres aron duslitan ang mainitong rally aron maka-ipsot sila’g siete puntos sa usa ka kulba-hinam kayaong duwa.

Si Jumag maoy nangu sa California sa iyang 14 puntos ug gi-abagan siya nilang Ray Alvarado ug Torres kinsa nagkumboya og 25 puntos.

Si Leo Gerasmio maoy nangu sa Beer Gins pinaagi sa iyang 17 puntos.

Ang (VBC) gipangulohan sa ilang presidente nga si Marlon Reyes ug ang founder sa maong grupo mao si Cabigas kinsa usa ka konsehal sa Talisay

Puntos matag usa:

First Game:

ALCORDS (92)- Alcordo 31, Nacario 16, Reyes 10, Bas 10, Cabrera 10, Basalo 8, Abatayo 5, Villagonzalo 2

VINTAGE (60)- Guba 15, W. Gerali 12, Dela Calzada 9, Traya 8, E. Gerali 7, Javierto 7, Redoble 2

Second Game:

CALIFORNIA (66)- Jumag 14, Alvarado 13, Torres 12, J. Guba 10, Cabañero 8, Cabigas 5, Camacho 2, Abatayo 2

BEER GINS (59)- Gerasmio 17, Lastimosa 13, Bustamante 10, Laroa 6, Yosores 6, E. Cabañero 5, Ochia 2.  - BANAT NEWS

Pardo gilampaso sa team Mambaling

Ni Gabby G. Malagar

CEBU, Philippines - Gipakita sa beteranong sentro nga si Danny delos Santos kung unsay mahimo og ikaatabang sa usa ka player nga dunay taas nga kasinatian dihang siya maoy mitimon sa Team Mambaling ubos sa beteranong coach nga si Danny Duran pag-iskor og 91-63 nga demolisyon sa ilang debut game batok sa barangay Pardo kaniadtong Sabado sa gabii sa nagpadayong Inayawan St. Augustine Fiesta Cup 2011 basketball tournament didto sa Inayawan Sports Complex.

Si Delos Santos nga usa ka 6-5 nga pivotman kinsa beterano na sa daghan kaayong mga commercial tournaments, mibahug ug 19 puntos lakip ang usa ka buzzer-beater nga triple nga mitapos sa duwa diin midaug sila og 28 puntos.

Samtang si Delos Santos nagpakita sa iyang liderato, ang kanhi Lyceum of the Philippines reserve ug kusgan kaayong power forward nga si Wowie Escocio maoy naghatag sa dakong danyos ngadto sa Pardo kay wala siya kapugngi sa iyang mga drives og migamit sa lapad niyang lawas isip taming matag ilog og bola sa kontra.

Si Escocio kinsa miamot og 15 puntos, mao na unya'y umaabot bantayanan sa CESAFI sa panahon nga moduwa na siya sa University of the Visayas (UV) Green Lancers sunod tuig.            

Ang Team Mambaling miduwa nga wala ang ilang import ang "gentle giant" gikan sa Kapatagan, Lanao del Norte walay lain ang 6-9 nga kanhi Lancer nga si Bonel Balingit,

Ang Mambaling maoy title favorite sa nahisgotang torneyo ug ang nakasamot sa ilang kalig-on mao ang presensiya sa point guard nga si Jerome Belano kinsa dili karon makaduwa sa Lancers sa umaabot nga CESAFI karong Agosto 7.

Si Belano maoy usa sa dako'g natabang alang sa Lion Tiger-UV Lancers aron modaug sa korona sa miaging 5th CESAFI Partner's Cup.             

   Laing nakasamot og lig-on mao sila si Hammer Daclan nga usa ka abtik ug paspas nga point guard, Michael Duran ang anak ni coach Duran, Michael Sumayang, Joseph Lausa ug kanhi Baby Lancer Christian Camay.

Ang Team Mambaling nga ubos sa ilang team manager nga si barangay councilor Emier Hamis, gipaluyohan sa corporate sponsor Cargo Forwarding Services ni Olive Paraguas.  - BANAT NEWS