Skyblazers, Ave Maria mipakaging sa ilang kaatbang

CEBU, Philippines - Nilampos sa ilang unang misyon ang Salazar Colleges of Science and Institute of Technology (SCSIT) Skyblazers ug ang Ave Maria Sanctuary Park batok sa tagsa-tagsa ka kaatbang sa pagsugod sa 1st M. Lhuillier Kwarta Padala-Cebu Basketball Association (MLKP-CBA) semifinals series niadtong Domingo didto sa Cebu Coliseum.

Ang top seeded Skyblazers nakabawos ngadto sa Asian College of Technology (ACT) Cyber Knights pinaagi sa pag-iskor og 85-77 nga kadaugan, samtang ang Ave Maria naka-ikyas bitbit ang uno punto nga kadaugan batok sa Talisay City, 90-89.

Mahimo untang bayani si Ferdinand Lusdoc sa Talisay kun iya pa nga napasud ang duha niya ka free throws sa daginutong oras sa duwa.

Si Mark Abadia, kinsa nangu sa third-quarter run diin ang Skyblazers milupig og pinuntosay sa Cyber Knights, 25-21 maoy topscorer pinaagi sa iyang 26 puntos, gisundan ni Ronan Isidro nga adunay 20 puntos, samtang si Stephen Padilla miabuno og 16 puntos.

Ang Cyber Knights gipangulohan ni John Villaver sa iyang 16 puntos, samtang sila si Michael Luga ug Alano Caputolan nagkumboya og 25 puntos.

Sa sayo pa, si Jercules Tangkay maoy topscorer sa Ave Maria pinaagi sa iyang   24 puntos. Sila si Alex Cainglet ug Mannie Gabas parehong mi-iskor og 15 puntos, samtang si Danny Aying adunay 10 puntos alang sa Ave Maria.

Ang 27 puntos nga nahimo ni Lusdoc nakawang lang kay ang palpak niyang free throws maoy nakahugno sa Talisay. Si Jayford Rodriguez mitampo og 17 puntos. (BANATSPORTS)