Krusyal na panalo pakay ng lady Stags VS Eagles

MANILA, Philippines - Pilit na ibabangon ng San Sebastian ang mataas na estado nito sa Shakey’s V-League sa pagpuntirya sa mahalagang panalo sa pagpapatuloy ng laro ngayon sa Fil-Oil Flying V Arena sa San Juan City.

Kalaban ng Lady Stags ang matikas na Ateneo sa tampok na laro dakong alas-4 ng hapon na sinisipat na mawakasan ang dalawang dikit na kabiguan na nagla­lagay sa peligro sa hangarin ng koponan na makausad sa susunod na yugto ng kompetisyon.

Kung mabibigo pa ay malalagay na sila sa sudden-death laban sa FEU sa kanilang huling laro sa group A sa torneong inorganisa ng Sports Vision katuwang ang Shakey’s Pizza at binigyan pa ng ayuda ng Accel at Mikasa.

Tila iniinda ng NCAA champions ang katotohanang hindi sila kumuha ng Thai import dahilan upang bumagsak ang kanilang laro laban sa Southwestern University at Lyceum.

Minalas pa ang San Sebastian na ma-injured ang kanilang mahusay na manlalaro na si NCAA MVP Joy Benito upang maiwan kina Cherry Macatangay, Suzanne Gonzales at Elaine Cruz ang ipakikitang laban para pigilan din ang Lady Eagles sa hangaring 4-0 sweep sa grupo.

Makausad na sa se­cond phase ng kompetisyon ang nasa isipan naman ng Lyceum sa pagharap sa FEU sa unang laban sa alas-2 ng hapon.

May 1-2 karta ang Lady Pirates at papasok sila mula sa 3-1 panalo sa Baste upang magkaroon ng momentum sa Lady Tamaraws na hangad ding makuha ang unang panalo matapos matapos sa naunang dalawang asignatura.