SRBC summer league pormal na nga gibuksan

CEBU, Philippines - Pito ka koponan sa bag-ong naporma nga San Roque Ball Club (SRBC) ang nisalmot sa labing una nilang torneyo nga giuloha'g "1st SRBC Summer Basketball League" nga gisugdan niadtong Domingo didto sa San Roque Sports Complex.

Ang mga ngan sa koponan gikuhagikan sa mga sikat nga mga koponan sa NBA nga mao ang Heat, Celtics, Spurs, Lakers, Magic, Bulls ug Knicks.

Si Barangay councilor Duke Espina, kinsa mao usab ang league commissioner miingon nga ang liga mosunod og single round robin format nga duwaon matag adlaw'ng Domingo diin ang top two human sa elimination phase maoy magsangka sa championship round.

Gipasiugdahan ni Nonoy Dumon, ang liga bukas sa tanang lumulupyo sa Brgy. San Roque nga nag-edad og 25-anyos pataas.

Ang SRBC mopahigayon sa ilang regular practice sa Miyerkules ug Biyernes sa alas-9 sa gabii.

Ang maong liga gisuportahan usab ni Cebu City Mayor Michael Rama ug sa San Roque barangay council ubos sa liderato ni Brgy. Capt. Roger Ruizo uban ni SK chairman Stephen Tapulado. –BANAT NEWS