Mandaue, Liloan mag-ilog sa no. 1 spot sa GUV Cup

CEBU, Philippines - Ang men's city ug municipal cluster champions Mandaue City ug Liloan, mag-ilog sa katungod sa duha ka adlaw nga aksiyon sa Cluster 6 sa 6th Governor Gwen Garcia Unity Volleyball (GUV) Cup karong adlawa diha sa Liloan Sports Complex.

Sukad gibalik ngadto sa orihinal nga clustering ang format sa maong kompetisyon, ang Mandaue ug Liloan nag-uban karon sa maong cluster.

Ang Mandaue ug Liloan mag-ilog sa unang dapit sa final cluster ning tulo ka bulan nga sporting event.

Apan ang Liloan seguradong mosubay og tungason nga dalan kay kasagaran sa ilang mga players mga bag-o nga pangulohan ni RP team beach volleyball member Jonrey Sasing uban nilang Jade Becaldo ug Jacky Yrog-irog.

Upat sa ilang first stringer nga migiya sa kadaugan sa Liloan sa miaging tuig nga kampiyonato nga sila si Angellan Visoc, Clifford Cafe, Maynard Alejandrino ug James Ryan Rivera dili makaduwa tungod sa mga kakulian.

Sa laing bahin, ang Mandaue pabilin gihapon sa ilang karaang players uban ang ilang reinforcement nga sila si Edward Ybañez sa University of Southern Philippines Foundation (USPF) ug Jesriel Pino sa University of San Jose-Recoletos (USJ-R).

Sa pikas bahin, kulbahinam usab ang sangka tali sa cluster defending champions Liloan belles ug sa Mandaue City, Compostela ug sa Cordova.

Ang champions sa matag dibisyon mobulsa og P20,000, samtang ang runners-up makadawat og P10,000 ug pasaporte sa quarterfinals sunod bulan diha sa Cebu International Convention Center (CICC) sa Mandaue City.

Ang top two winners makig-uban sa laing quarterfinalists.

 Ang quarterfinalists sa men's division mao ang Alcoy, Moalboal, Talisay City, Minglanilla, Barili, Toledo, Sta. Fe, Bogo, Carmen ug Poro. Samtang sa women's division mao ang Alcoy, Alegria, Minglanilla, Barili, Tuburan, Sta. Fe, Tabuelan, Pilar ug ang city ug municipal cluster women’s champions Talisay City ug Catmon. – BANAT NEWS