Team Cebu City andam manalipod sa titulo

CEBU, Philippines - Nagpanikad na ang Cebu City team nga modepensa sa ilang overall title sa pagsikad sa Milo National Open Track and Field Championship karong Mayo 21-23 didto sa Rizal Memorial Sports Complex.

 Mangulo sa line-up sa Team Cebu mao ang mga kampiyon sa miaging CHED National Games nga si Lindley Fran Navaja ug Kent del Rosario nga maoy pambato alang sa 100m ug 200m sprint events. 

Si Dharl Pitogo mao ang ibala sa 110m ug 400m hurdles, si Ernesto Ybañez alang sa long, triple ug high jump ug si Carl Jeannette Malazarte   sa 3000m steeple chase.

Duha ka elite athletes sa Sugbu -- Daniel Noval ug Ivan Castañeda dili makapakita'g aksiyon alang sa Team Cebu.

Ang Palarong Pambansa record holder nga si Noval gipili nga moduwa alang sa Ateneo de Manila University sa national open, samtang si Castañeda kinsa maoy mihatag sa labing unang gold medal alang sa Region-7 sa miaging Palaro, dili usab moduwa tungod sa personal nga rason.

Si Lyle Larida, ang assistant coach sa team Cebu City nagkanayon nga makaapekto og daku ang pagkawala sa duha   ka sinaligan nilang runners alang sa ilang tinguha nga mosakmit og laing kampiyonato, apan daku gihapon ang ilang kahigayonan nga mamahimong over-all champion. – BANAT NEWS