Adlawan hawod sa 1st Tomas Osmeña Moto-x Cup

CEBU, Philippines - Misubang og balik si international motocross sensation Jon Eleazar Adlawan dihang iyang gisakmit ang titulo sa pro open category sa 1st Mayor Tomas Osmeña Motocross Cup niadtong Domingo diha sa South Road Properties (SRP).

Human sa taas nga panahon niya nga pagkawala sa eksena sa motocross dinhi sa Sugbu, gipakita pag-usab ni Adlawan ang iyang ngilngig nga stunts aron paghari sa iyang kategoriya.

Ang pambato sa Dimapuro Brothers sa Lanao Del Norte nga si Kimboy Pineda maoy mi-okupar sa ikaduhang dapit, samtang si Jubenile Abellar maoy mitungtong sa ikatulo.

Wala hinuon mausik ang pag-apil ni Pineda kay iyang gidominar ang intermediate class, gisundan nila ni Abellar ug Ted Conde alang sa ikaduha ug ikatulo nga dapit.

Ang big boss sa Keiz BJ Racing Team nga si Siegfred Ornopia mao sab ang nanghawod sa executive A division uban nila ni Nonoy Reluya ug Jun Enriquez nga nalandig sa ikaduha ug ikatulo.

Hinuon, si Enriquez mibitbit og champions trophy human maghari sa veterans B batok nilang Ricky Coca ug Andy Krickle nga miangkon sa ikaduha ug ikatulong dapit.

Laing batan-ong motocross rider nga si John Flores ang mipakita usab sa iyang katakus aron makuha ang titulo sa novice open production. Mikompleto sa

top three finishers mao sila si Bon Maruhom ug Ryan Quirol.

Si Donkey Sanchez mao sab ang miangkon sa titulo sa local enduro human niya gipilde silang Bonnie Bustillo ug Ray Querol, nga mipahiluna sa ikaduha ug ikatulo nga dapit. Wala sab magpaperi si Jesse Pineda ug mao sab ang misakmit sa beginners open production title ug si Junar Pamplona maoy gikoronahan isip kampiyon sa TK class.

Sa pewee class, BJ Pepito maoy misakmit sa kampiyonato, gisundan sa anak ni Ornopia nga si Kerry Jean Ornopia nga mipahiluna sa ikaduha, gisundan ni Vince Batolan alang sa ikatulo.

Si James Mark Mayol mao ang midaog sa mini class batok nila ni Tamtam Largosa ug BJ Pepito.    (BANATNEWS)