Nagpabilin tungod sa anak

Dear Tito Miguel,

Maayong adlaw kanimo, ako  diay si Clarisse, ug gusto unta ko mangayo og tambag bahin sa akong relasyon sa akong live-in partner nga si John. Aduna kami  tres anyos nga anak  nga lalaki.

Matag higayon nga maglalis mi, adunay usa ka butang nga kanunay niyang isulti nga sakit kaayo para nako. Moingon gyud siya nga ang among anak na lang kuno ang bugtong rason nganong nagpabilin pa siya sa among relasyon. Ang akong gusto mao nga respetohon unta  ko niya,  ug ipabati nga importante gihapon ko isip iyang partner.

Dili ko gusto nga magdako ang among anak sa usa ka pamilya nga puno sa panaglalis ug kasakit, apan dili usab ko gusto nga magpabilin sa usa ka relasyon diin kanunay kong gibaliwala.

Tito Miguel , unsa man ang angay nakong buhaton? Kinahanglan ba nakong antuson ang tanan alang sa among anak, o panahon na ba nga hunahunaon usab nako ang akong kaugalingong kalipay ug dignidad? — Clarrise

* * *

Clarisse,

Ayaw pag-antos sa relasyon nga dugay nang  natapos. Dili maayo magpabilin kun tungod ug alang lamang sa inyong  anak. Gani, mas  makadaot pa niya kun magdako siya nga kagubot ra iyang makita sa iyang  mga ginikanan.

Gipamulong na man sa imong kapuyo nga wala na siya’y amor kanimo, ihatag kaniya ang kagawasan. Sa sunod kun ibalik na niya’g sulti, ingna dayon mahimo niya nga tinud-on. Ka’y hasta ikaw nag-agwanta ninyong duha. Gani, dili na mistil nga imong paaboton nga iyang usbon, mahimo na ninyo istoryaha’g tarong. Klaroha kun iya ra ba na gisulti tungod sa kalagot o mao gyud na’y naa sulod sa iyang dughan, nagpaabot la’g higayon nga iyang ipabuhagay.

Wala na man kaha siya’y respeto, ayaw na gukda. Ang respeto dili nimo pangayoon, bukal kini sa kaugalingon. Karon kun moingon siya nasulti lang to niya kay  naputos siya sa emosyon, ayaw’g tuo, mao gyud na’y naa sa iyang ilawom. Puwede ra man gud ka balikason kun mag-away mo, ngano kana man gyud iyang ipamulong.  Kun mo-ingon tinuod, inyong relasyon angay na taposon, ayaw’g balibad. Ihatag ang kagawasan bahala’g masakitan ka karon. Kay  kun imong pugson, samot ka masakitan sa umaabot nga panahon. Inyong relasyon  wala na’y karon ug kaugmaon. Pero klaroha nga kinahanglan magpadayon siya’g suporta sa inyong anak. Mao ra man kaha na iyang pinangga, wala na’y apil ang inahan. O di karon angay niya tinud-on pinaagi sa lihok. -Tito Miguel-

Magpatambag ka? Ipadala kang Tito Miguel: 0991-318-9366