SWU ug uc parehong kampiyon sa Butuan

CEBU, Philippines - Kuwang na lang unta og labing menos sayis puntos aron magsaulog og talagsaon nga double championships ang University of Cebu (UC) tungod kay napilde man ang Webmasters sa ilang kampanya didto sa National Students Basketball Championships batok sa Southwestern University (SWU) Cobras sa iskor, 73-78 sa collegiate finals didto sa Urios College gym sa Butuan City, Agusan del Norte.

Hinuon, nakalingkawas ang UC Junior Webmasters aron pagsakmit sa korona sa high school division human ilang gipatapsingan ang Philippine Christian College sa Cagayan de Oro City, 89-88 atol sa finals sa miaging adlaw. 

Walay kausaban sa gipakitang lihok sa 6-9 nga higante sa UC nga si June Mar Fajardo apan ang iyang 35 puntos dili pa igo nga mosalbar kanila ug sukwahi kini sa 21 puntos nga nahimo ni Alfred Belande nga maoy nakatabang aron makahimo sila'g back-to-back championships.Ang Cobras maoy defending champion human ilang gipilde ang UV Green Lancers sa miaging tuig diha sa Cebu Coliseum.

Kung kahinumdoman, ang Cobras midaug sab batok sa Webmasters atol sa CESAFI Partner's Cup finals kaniadtong Marso diha gihapon sa Cebu Coliseum, 3-1 sa ilang best-of-five series.

Si Eliud Poligrates mi-iskor og 18 puntos ug si Eric Zanoria midugang og 11 puntos alang sa Cobras apan sa habig sa UC, layo kaayo ang nagsunod kang Fajardo nga si Moncrief Rogado kinsa mihakot og 17 puntos.

Ang labing dimalas kay si Janssen Abella wala gyud makahuygo kay igo lang siya mi-iskor og tres puntos.      

Sa juniors division, si Roger Pogoy maoy nangu sa UC sa iyang 21 puntos ug si Zandro Panlileo mi-iskor og 10 puntos. - Gabby G. Malagar (BANAT NEWS)