Rollyr Boyz, Aqua Serv mipukan sa ilang kontra

CEBU, Philippines - Ang Rollyr Boyz team ni Punta Princesa barangay captain Rolly Diorico milubong sa Kuya Allan ni Allan Guibelondo, 94-76, samtang ang Aqua Serv Mineral Water ni Laarni Orozco mipukan sa Grandeur team ni Grandeur Liboon, 74-69 sa pagpadayon sa F. Llamas Youth Association (FYA) 1st Vice Mayor Mike Rama Cup didto sa Vicente Sotto Memorial Gym sa barangay Punta Princesa, ning siyudad.

Sila si Chrissar Llegunas ug Daniel Enriquez nga parehong mi-iskor og 18 puntos alang sa Rollyr Boyz, nagbahin sa dungog isip best player ug three-point king contest.

Sila si Paul Basalo ug Dexter Caballero nagkumboya og 29 puntos alang sa Rollyr Boyz, kinsa mao sab ang nidaog sa best in uniform atol sa opening day niadtong Sabado.

Ang Kuya Allan nga adunay upat sab ka players ang mi-iskor og double figures gipangulohan ni Ranel Pataleta sa iyang 23 puntos. Tungod kay daginuton ang ilang players atol sa maong duwa, ang Kuya Allan gipahamtangan og silot pinaagi sa pagkuha og puntos hinungdan sa ilang dakung kapildihan.

Si Lolito Quita adunay 14 puntos alang sa Kuya Allan, si Kenneth Marquida miamot og 13 puntos ug si Noel Medalle mitampo og 12 puntos.

Sa sayo pa, si Tito Bacarisas miharos sa best player ug three-point king of the game awards dihang mi-iskor kini’g 22 puntos aron pangulohan ang Aqua Serv, samtang si Janus Abellana mitimba og 13 puntos.

Sila si Dondon Cadungog ug Rovel Tabar nagkumboya og 29 puntos alang sa pilderong Grandeur team.

Puntos Matag Usa

Unang duwa:

Aqua Serv (74) - Bacarisas 22, Abellana 13, Villacastin 8, Navarro 8, Garica 6, Bahina 5, Sensontic 4, Magallon 3, Pacubas 2, Avila 2
GrandeUr (67) - Cadungog 16, Tabar 13, Dacayana 6, Gay 5, Sabalande 3, Pacaña 3, Navaja 2, Medalle 1, Lañohan 1

Ikaduhang duwa:

Rollyr Boyz (94) - Llegunas 18, D. Enriquez 18, Basalo 17, Caballero 12, J. Enriquez 8, Marata 7, Lantaca 6, Dela Cerna 2, Paloma 2, Gallardo 2
Kuya Allan (76) - Patalita 23, Quita 14, Marquida 13, Medalle 12, Canceko 4, Reobal 4, Ylanan 2, Solon 2, Joedan 2. – BANAT NEWS