Fareñas mipaundang sa bisitang Thai boxer

Ang US-based Filipino boxer nga si Michael Fareñas nakakuha og inspirasyon gikan sa iyang manedyer nga si WBO bantamweight champion Gerry 'Fearless' Peñalosa pinaagi sa pag-iskor og one-punch knockout batok ni Thai Boonmee Sithsrivinitwitthayakom  sa main event sa “Rambulan sa Liloan” boxing card niadtong miaging gabii didto sa Panphil B. Frasco Memorial Sports Complex sa Liloan, Cebu.

Naglisud si Fareñas sa   sa unang hugna kay si Boonmee agresibo  kaayong moaway ug niadtong higayona gidabodabohan ang Pinoy’ng boksidor sa iyang counter-punching skills.

Giisa ni Boonmee ang iyang mga kamot ug iyang gihagit si Fareñas sa  pagdasdas kaniya ug  iladlad ang iyang abilidad.

Apan ang marunong si Fareñas hinay-hinay nga mirumbo sa lawas ni Boonmee hangtod nga nahutdan kini sa hangin  sa   ikalimang round  tungod sa mga solidong kumo nga misampak sa lawas sa kontra.

Naundang ang kabagsik ni Boonmee sa oras nga 1:18 sa ikaunom nga round dihang nataymingan sa left uppercut ni Fareñas.

Ang way suwerteng si Boonmee nahagba sa canvass ug nagping-it  sa kasakit. Giiphan siya ni referee Teddy Alivio apan wala kini makabangon.

Gawas nga misaka ang iyang rekord ngadto sa 22-2-22, 18KOs, si Fareñas miselyado sa iyang showdown ni Hussein Pazzi (17-8-1, 7KOs) sa Tanzania alang sa interim WBO Oriental featherweight championship sa undercard sa WBO title defense ni Peñalosa batok ni Mexican challenger Nestor Rocha karong Septiyembre 20 didto sa Mindanao Civic Center sa Tubod, Lanao del Norte.

Sa laing aksiyon, si Jonathan Baat sa Wakee Salud Stable mipalukapa sa ikaduhang hugna ni Daniel Diolan sa Zamboanga City, si Rodolfo Sumabong sa Cebu mi-iskor og second round TKO batok ni Renan Branzuela sa Bukidnon, samtang si Jason Siaton sa Lapu-Lapu City mipakamang ni Elmar Francisco sa ikaduhang hugna.

 Si  Adonis Aguelo sa Mandaue City mi-KO ni Randy Megriños sa Cotabato sa ikalimang round.

Lain pang nidaog mao si Andy Señeres pinaagi sa unanimous decision batok ni Jaime Bermiso ug Dave Baliguat kinsa mipaundang ni Aljered Tuñacao sa ikaduhang hugna. Ang away nilang Jherpaul Valero batok ni Ponce Villacura ug Kevin de la Cruz batok Ramelo Estra pulos misangko sa  majority draw.