Hannah batok Tubigan Jupiter sa finals

Nahun-og ang dughan sa mga fans sa ASA Dribblers dihang nadisgrasya ang ilang manok sa powerhouse Hannah Electrical Supply Five sa kulbahinam kaayo nga do or die semifinals sa Asturias Town Fiesta Inter-Barangay Basketball Tournament, 92-91, dihang nipahagsa og makabungog nga tres si Regie Gonzales sa Hannah sa  naghinapos nga bahin sa duwa aron pagsulod sa finals sa miaging Domingo didto sa Asturias Sports Complex.

Sa maong kadaogan, ang Hannah maoy nakakuha og katungod nga makigharong sa Tubigan Jupiter sa finals karong Hulyo 13 adto gihapon sa Asturias Sports Complex.

Samtang ang dismayadong ASA kinsa nakalabaw og singko puntos, 42-37, human sa unang tunga makigtakos sa OWAK alang sa ikatulong luna.

Sa laing bahin, si Municipal Vice-Mayor Joel Dumdum nipahibawo nga karong Hulyo 14, buksan na ang 2007 Open Invitational Basketball Tournament diin ang Balamban ug ang Asturias maoy nag-unang team nga konpirmadong mosalmot.