EDITORYAL - Nasaan na si Alice Guo?
![EDITORYAL - Nasaan na si Alice Guo?](https://media.philstar.com/photos/2024/07/18/psntoon_2024-07-18_21-27-46.jpg)
ANG patuloy na hindi pagpapakita at pagdalo ni suspended Bamban, Tarlac mayor Alice Guo sa mga pagdinig ng Senado ay naghahatid ng mga hinala na posibleng wala na siya sa bansa. Ganito ang maaaring isipin nang marami sapagkat ilang beses nang nagsasagawa ng pagdinig ang Senado ay hindi siya sumisipot at hindi makita maski ang kanyang anino. Nasaan na si Alice Guo?
Pero sabi ng kanyang abogado, narito raw sa bansa ang kanyang kliyente at nag-uusap sila. Pinayuhan na nga raw niya na sumipot ito sa pagdinig. Nagka-trauma raw si Guo at mayroon din itong banta sa buhay.
Sinilbihan ng warrant of arrest ng Senado si Guo at pitong iba pa noong Hulyo 13 pero wala ang mga ito sa address na nakasaad sa warrant. Tanging ang accountant ni Guo ang naaresto ng Senado at nasa detention facility na. Nakahanda na ang paglalagakan kina Guo at iba pa sa Senado sa sandaling sumuko na ang mga ito. Nahaharap si Guo sa mga reklamong may kinalaman sa Philippine Offshore and Gaming Operators (POGOs). Inirereklamo si Guo sa mga natuklasang illegal POGOs sa Baufu Compound sa Bamban. Ayon sa Senado, incorporator si Guo sa mga sinalakay na POGOs. Ang compound ay pag-aari umano ni Guo na tinanggi naman nito. Malapit lamang sa Bamban Municipal Hall ang mga sinalakay na POGOs.
Sinabi ni Sen. Sherwin Gatchalian na posibleng makaalis ng bansa si Guo gamit ang Chinese passport nito. Ayon sa senador si Alice Guo at si Guo Hua Ping ay iisa. Sa pag-iimbestiga naman ng National Bureau of Investigation (NBI), kinumpirma na iisa ang fingerprint ni Alice Guo at Go Hua Ping. Sabi pa ni Gatchalian, parehong ginagamit ni Alice Guo ang kanyang Chinese at Philippine passports mula 2008 hanggang 2011.
Maaaring mangyari ang mga sinabi ni Gatchalian na makalabas ng bansa si Alice Guo gamit ang kanyang Chinese passport. Wala namang imposible sa mga sinabi ng senador sapagkat laganap ang korapsiyon sa bansa. Makapangyarihan ang pera at maraming nasa tanggapan ng gobyerno ang maaaring tapalan ng pera.
Patunay dito ang sinabi ni Gatchalian na sa halagang P300,000 ay maaari nang makakuha ng valid Philippine passport at birth certificate ang mga dayuhan. Wala raw kahirap-hirap sapagkat may mga taong naglalakad para makakuha ng mga kailangang dokumento.
Paano nga kung nakaalis na sa bansa si Alice Guo? Paano kung nakalusot siya sa Bureau of Immigratiom (BI)? Maraming BI officials ang nasangkot sa “pastillas scam” noong 2021 nang makapasok sa bansa ang maraming Chinese, kapalit nang mahalagang halaga ng pera.
Hindi kaya ganito rin ang nangyari kay Alice Guo? Nasaan na nga kaya siya?
- Latest