Kinsa gyud ang sad-an?

Kinsa man gyud ang nanguna pagpamusil tali sa duha ka polis, batok sa usa ka lumolupyo sa Barangay Sudlon 2, bukid nga bahin sa Cebu City nga misangpot sa pagkamatay sa usa ka opisyal sa kapolisan?

Kon ang habig sa kapolisan maoy imong paminawon, sila Police Captain Joel Deiparine ug kaubang polis naghimo og surveillance didto sa bukid, dihang giunhan sila’g pusil ug dayon nahitabo ang pinusilay.

Apan kon si Leonardo Manto Jr. sab maoy pasultihon, matud niya nga giunhan siya’g pusil sa tawo nga nag-angkas sa motor ug nagdali pagkanaog nga nagbitbit na og armas, dayong pusil kaniya.

Si Manto nga usa diay ka reservist sa Army, dunay 45 kalibre nga pistola ug matud niya napugos siya pagbawos ug pusil kay nagpaingon na sa iyang nahimutangan ang armadong tawo nga wa niya masayri nga polis diay.

Pagbawos ni Manto, naigo kuno niya ang bitiis sa tawo nga nagpusil niya, ug naka-change magazine pa siya, mao nga gigukod niya ang duha ka armado nga miikyas nga nagtakiang.

Matud ni Manto nga giusban niya’g pusil ang tawo nga nagtakiang na ug naigo niya kini sa ulo, dayong kamusmos sa yuta. Nakurat na lang si Manto dihang dunay nagpahibawo niya nga polis ang iyang napatay.

Gikan si Manto sa Talisay, ug paingon na nga mopauli sa Barangay Sudlon 2, apan pag-abot niya sa karsada paingon sa Manipis, kay anha man siya mag-agian paingon sa Sudlon 2, nakakita siya’g duha ka tawo nga may motor nga nagparking daplin sa karsada.

Pag-abot ni Manto sa unahan, iyang nabantayan nga gisunod siya sa maong nagmotor, ug sa dayon niyang sulod sa gamay’ng karsada paingon na sa iyang balay, midali’g hunong ang nagmotor, ug miambak ang nag-angkas.

Diha na matud ni Manto nga gipusil siya pag-una apan wa siya maigo, ug mibawos siya pagpusil sa maong tawo, nga mao diay si Captain Deiparine, sakop sa PNP Criminal Investigation and Detection Group.

Kon tuohan nato si Manto nga siya ang giuna pagpusil, ngano man kaha nga pusilon man siya ni Deiparine? Kon ibutang nato nga ang mga polis ang gi-ambush ni Manto, siguroon gyud unta ni Manto nga di makabawos ang nagmotor.

Unya, nganong wa man say plaka ang motor nga gigamit nila ni Deiparine? Matud ni Manto mao ni ang nakapaduda gyud niya nga mga daotang tawo ang gustong mopatay kaniya, kay nag-bonnet pa gyud.

Buyno, paabuton nato ang kompleto nga imbestigasyon niini sa kapolisan kabahin sa maong hitabo. Bisan ako, di ko gusto nga ang mga polis nga maghimo’g operation magsul-ob og maskara.