Pagkat-on, pagpasayon, paglahutay

Kining tulo ka mga pulong dako kaayo og kahimoan dili lang sa atong kinabuhi kondili usab sa paagi nga kita mag-ampo ug makigsuod sa Dios. Adunay mga higayon nga malisudkaayo ang pag-ampo. Dili lang sa mga layko o ni bisan kinsang tawo kondili lakip na usab niini ang mga pari ug mga relihiyoso. Ngano man? Tungod kay kadaghanan kanato nahikalimot sa kahulogan ug hulagway sa usa ka kasinatian sa pag-ampo. Ang butang simple atong gihimong komplikado.

PAGKAT-ON. Ang pagkat-on mahimong makab-ot pinaagi sa pagtuon ubos sa landong sa mga batid. Nunot niini ang paggahin gyud sa panahon aron makakat-on ug labaw sa tanan ang kaandam nga mosinati sa mga pamaagi nga haom sa kaugalingon. Kini tungod kay ang pamaagi sa uban mahimong dili mohaom sa imong kaugalingong mga pamaagi ug kinaiya.

PAGPASAYON kun Himoa kining Praktikal Alang

Kanimo. Komplikado usahay ang atong pagsabot ug pamaagi. Apan ang tanan magsugod gyud sa paagi nga gisabot o nasabtan nato ang atong kalambigitan sa Dios. Mao nga ang maong pag-ila mao man usab ang pamaagi nga kita makigkukabildo kaniya. Alang kang Santa Teresa sa Avila ang pag-ampo usa ka pakighigala. Unsaon man nato pagsinati sa maong pakighigala kun malisud alang kanato ang pagduol? O dili ba kaha ang pagduol sa atong buot mahimong higala?  Ang gikinahanglan niini mao gyud ang kaabli sa kaugalingon. Lakip na niini ang atong kasingkasing. Kun abli ang atong kasingkasing makasulod ang Ginoo sa atong kinabuhi. Mao tingali nga dunay mga panahon nga mahimo kitang brokenhearted gumikan sa atong binuhatan kay pinaagi sa maong higayon, makasulod ang Ginoo sa atong kinabuhi.

PAGLAHUTAY.  Dili paigo ang pagsugod ingon man pagkat-on. Hinunoa nagkinahanglan kini og pagbansay ingon man paglahutay. Kining maong pamaagi makatabang dako uyamot aron mamahimong kabahin sa Sistema. Ug kini ang giingon ni Sto. Tomas de Aquino: “The more we are experienced with a particular reality, the more this reality become real to us.” Ingon ini usab ang atong pagsinati sa Dios, kun kanunay nato siyang sangpiton, mamahimo gyud siyang tinuod alang kanato. Salig sa Ginoo kay diha lamang sa pagsalig ngadto sa iyang pag-amoma kita mamahimong makapadayon sa atong panaw uban ang tumang kalinaw ug paglaum. Kay kun naa kanato ang Dios, ang tanan ania na gyud kanato.