Mga pangutana ni Sara
Karong naibanan nang mga problema ni Bise Presidente Sara Duterte–dili na kinahanglang mopasabot duna ba g’yuy gisugo pagpatay ni Presidente Ferdinand Marcos Jr., First Lady Liza Araneta Marcos ug kanhi House Speaker Martin Romualdez ug dili na maglibog kinsa silang Mary Grace Piattos, Dodong Bunal ug kaubanan–makatingob na siya sa pagpangita sa labing katuohan nga tubag sa mosunod nga mga pangutana:
1. Nganong nakadawat man siya og P2.3 milyones nga suweldo isip trabahante sa Davao City Hall niadtong 2023 nga nakalingkod na mang bise presidente sukad Hunyo 30, 2022?
* * *
1. Nasaypan ba lang og apil ang iyang ngalan sa payroll ug kon sipyat lang nganong napirma man siya sa dokumento nga nagmatuod nga nadawat niya ang kuwarta?
2. Nahigot na man sa iyang mga trabaho isip bise presidente ug education secretary, duna pa bay nahibilin nga panahon sa pagtuman sa unsa nga puwesto sa City Hall?
* * *
1. Kon adviser o consultant sa iyang manghod nga mayor o pag-umangkon nga bise mayor o bayaw nga konsehal, nganong dako man kaayong suweldo (susama sa gidawat sa mayor pa siya)?
2. Duna bay pagtugot gikan niya ang pagsulod sa GenCorp Industries Inc. (nga gilista sa iyang statement of assets, liabilities and net worth) og 19 ka kontrata, upat ra ang niagi og subasta, uban sa iyang manghod nga mayor ug giaprobahan sa iyang pag-umangkon nga bise mayor sa pagsuplay og P34 milyones nga balor sa pagkaon sa City Hall sukad sa 2022 hangtod sa 2026?
* * *
1. Wala ba siyang kahunahuna sa kangil-ad sa implikasyon nga ang Cale88 Foods Corporation (laing kompaniya nga gilista sa iyang SALN) nidawat og P319 milyones (nga mas dako sa P208 milyones nga halin nga ilang gideklarar ngadto sa Bureau of Internal Revenue) gikan sa China (nga nigamit na og puwersa sa makadaghang higayon sa pagpangilog sa dakong bahin sa atong nasudnong teritoryo)?
2. May mga dokumento ba siyang momatuod nga banana chips ra gyod ang ilang gibaligya ngadto sa China ug walay labot ang Palawan, Batanes ug bisan unsang bahin sa West Philippine Sea ug wala say labot ang pagtukod sa labing gamhanan nga troll army pagseguro nga siya na ang magtungkawo sa Malakanyang sa 2028?
* * *
- Latest
