Kabus man apan dunay tim-os nga tinguha sa pagserbisyo busa dili angayan hukman

Mora'g nagmingaw pa ang unang adlaw kagahapong adlawa ang filing sa Certificate of Candidacy sa buhatan sa Commission on Elections o Comelec diin expected naman gyud kini kay mag-ilog man lagi sa kataposang adlaw sa pagduso karong Oktobre 8 kay pampaswerte. Pastilan silang tanan modaug kong tinuod man ugaling. Hangtud diay karon motuo pa og ingon niini kining mga kanahan nga politiko, walay salig sa ilang kaugalingon kay nagsalig gihapon sa swerte.

Maayo pa kining usa ka taxi driver nga nga nag-una una sa pagduso sa iyang COC sa Comelec Cebu South District kinsa magpapili pagkakonsehal. Wala siya magsalig sa swerte kay dako iyang kompiyansa nga molusot kong buligan sa katawhan. Kabus man siya apan dako og tinguha nga makatabang sa sama niyang kabus nga kanunay gamiton lang sa mga politiko niining panahon sa eleksiyon.

Siya si Abraham Abdon Alcontin Verdida. Ako na ni siyang na-feature kaniadto sa iyang serbisyong gihimo atol sa iyang birthday nga maoy iyang panaad nga magpa free ride sa mga pasahero, iyang i-full tank ang taxi ug magtuyok tuyok sa Metro Cebu area aron librehon sa pagpasakay ang mga tawo nga iyang maagian. Hatagan pa gyud niya og kwarta nga 200 pesos nga iyang tinigom sulod sa usa ka tuig. Dili lang pakulo o gimmick kay niabot na sa lima ka tuig niyang gihimo kini.

Bisan pa man sa kalisod nga iyang nasinati apan nakapaambit siya sa iyang grasya ngadto sa mga tawo nga dili niya kaila. Kong ingon pa lang niini ang kinaiya sa ubang mga politiko nga sapian pagkanindot unta kaayo kay daghan ang mabulahan. Apan unsaon ta man nga panahon ra sa kampanya magpakita kining mga kanahan ug kong makadaug na mahisama sa tagolilong dili na makit-an sa mga kabus nga nagkinahanglan, masakit na dayon sa kalimot nga dili na mahinumdum sa ilang saad.

Sa estado sa kinabuhi ni Abdon, ang uban mangyam-id og moingon naango-ango naman kining tawhan patuga tuga og lansar nga walay kwarta. Dili nato gyud mahukman ang tawo kay sa sama ni Abdon basin siya pa ang dali nga makatabang sa mga sama niya nga nagkinahanglan.

Usa sa nagtukmod sa sama ni Abdon nga magpapili sa umaabot nga eleksiyon ang kapakyasan sa serbisyo sa mga nangatungdanan ngadto sa mga tawo sama kaniya. Busa nangandoy sila nga mao na usab ang mohupot sa renda sa pangagamhanan kay basin maangkon nila ang gipaabot nga kausaban.

Atong atangan nga daghan pa ang sama ni Abdon nga adunay tim-os nga tinguha sa pagserbisyo bisan pa man kon sila hukman sa mga mata pa lang sa mga tawo nga hilig makaminos sa ilang isig ka tawo. Dili nato ihikaw ug bugalbugalan ang atong mga kaigsoonan nga nangandoy nga makatabang tungod lang kay sila kabus itandi sa mga naandan nga politikong adunahan apan dili maduolan.