Pulos nitibugsok
Sayop ang pagtuo ni Bise Presidente Sara Duterte Carpio nga makatabang niya ang pag-isnab sa budget hearing sa House Appropriations Committee ug pagdumili pagtubag og mga pangutana sa mas dakong budget nga iyang gipangayo para sa sunod tuig ug giunsa paggasto ang iyang budget sa nangaging katuigan.
Napamatud-an sa labing uwahing survey sa Pulse Asia nga naibanan ang iyang mga dumadapig sa pag-insulto sa Kongreso: Gibuyboy si Senador Risa Hontiveros nga nangutana parte sa iyang libro; nisuway pagdiktar kinsay mo-preside sa appropriations committee hearing; ug pagboykot sa nisunod nga deliberasyon.
* * *
Sayop sab ang pagsalig ni Carpio nga ang iyang pagsunod sa estilo ni kanhi Presidente Rodrigo Duterte sa pagsige og panaway sa kapolisan, mga kongresista ug Malakanyang. Kay gawas nga taphaw ug walay ebidensiya, kasagaran sa giluwatan nga mga pasangil nisumbalik niya ug sa administrasyon sa iyang amahan.
Nitumaw sa nasudnong survey sa niaging buwan nga nitidlom ang mga nisalig ug nisuporta ni Carpio bisan sa pagpalaban nga giapiki sa administrasyon ang iyang pamilya ug nga gimaniobra nang House Speaker Martin Romualdez ang paglusad og impeachment proceedings batok niya.
* * *
Klarong naapektahan sab ang popularidad ni Carpio sa iyang pagdupa sa gipasanginlang pedophile, rapist ug mangingilad nga si Apollo Quiboloy (nisuway pa sa paglipat sa kapolisan nga hagbay rang nakalayas si Quiboloy sa Davao) ug pagpakahilom sa nagkagrabeng mga panghasi sa Chine sa West Philippine Sea (WPS).
Napiskan sab siya sa pagsulbong sa mga ebidensiya sa mga imbestigasyon sa Senado ug sa House nga naglambigit sa mga alyado sa iyang amahan sa Philippine Offshore Gaming Operators (POGOs), illegal drugs ug extrajudicial killings.
* * *
Pero bisan sa tanan niyang bulilyaso, si Carpio nagpabiling mas popular ni Presidente Ferdinand Marcos Jr. Nga wala makapahimulos sa kinatibuk-ang kredito sa sunudsunod nga pagkasikop nilang Alice Guo ug Quiboloy.
Kay nagmugna sab ang presidente og iyang kaugalingong eskandalo: Nitambong og konsiyerto sa Duran Duran nga gibanabanang gigastohan og P60 milyones atol sa iyang birthday party; sa samang adlaw nga nahutdan og bugas nga lugawon ug tubig nga ma-inom ang makaluluoy nga mga tripulante sa BRP Teresa Magbanua taliwala sa mga hudlat sa China maong napugos sa pagbiya sa Escoda Shoal sa WPS.
* * *
- Latest
