Unsaon pagkolekta ang utang kun miuntol ang cheke nga gibayad?

Dear Atty. Divine,

Ang akong igsuon giutangan sa akong amiga og P100,000.00. Nagpautang ang akong sister kaniya kay ipuhunan daw sa  negosyo sa akong amiga. Mipasalig ang nangutang nga bayran dayon ang utang after 6 months og mi issue siya  og postdated check ngadto sa  akong igsuon. Gipapirma sab niya og promissory note ang akong amiga. Karon pagpa encash sa akong sister sa cheke  pagabot sa due date miuntol man kay way pundo. Iyang gitawgan akong amiga apan di na makontak. Ako sab gitawgan di na motubag. Unsay angayng buhaton  sa akong sister aron makolekta niya  ang maong utang human.miuntol ang cheke? Daghang salamat. -- Mary

Dear Mary,

Ang unang buhaton sa imong sister mao ang pagpadala og demand letter sa imong amiga pag-settle sa iyang utang human miuntol ang cheke nga iyang gi issue. Kun dili gihapon kini mobayad, mamahimong mo file ang imong sister og kasong kalapasan sa BP 22 batok sa imong amiga. Usa kini ka criminal offense busa mamahimong  mapriso ang imong amiga  kun mapamatud-an og hayan ma-pressure sab siya sa pagbayad sa utang kun dunay criminal case nga i-file batok niya.. Mamahimo sab nga Civil Case  lang ang ipasaka sa imong sister kun ang gusto niya mabayran lang sa utang. Sa Civil case,  mo file siya og kaso for collection of sum of money ubos sa small claim case ngadto sa MTC.  Mas paspas ang proseso niini ug di na sab siya magkinahanglan og abogado. Naa nay form ang korte nga mamahimo niyang i-fill - up alang sa pag-file sa kaso. Thank you and God bless. -- Atty. Divine

Alang sa inyong pangutana,  palihug lang sa pag email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.