EDITORYAL — Hiniusang Sugbo

Ug nagpaklaro na ang mga nagkadaiyang politiko dinhi sa Sugbu, ug ning higayona, usa sa mga partido sa Cebu City ang nipasilong sa landong sa pinakadakong partido politika dinhi sa Sugbu nga mao ang One Cebu Party sa mga Garcia.

Kagahapong adlawa, nagtigom ang dili momenus usa ka libo ka mga miyembro sa One Cebu alang sa ilang pagpangandam para sa unang adlaw sa pagduso sa sertipiko de kandidatora karong adlawa Oktubre 1, alang sa Mayo 2025 nga midterm elections.

Ang pangulo sa One Cebu nga si Gobernador Gwendolyn Garcia mipirma sa kasabutan nga silang nagpasilong sa partido maghiusa ug magtinabangay sa umaabot nga eleksyon.

Ang Kugi Uswag Sugbo (KUSUG) Party  nga girepresentahan sa presidente niini nga si  acting Cebu City Mayor Raymond Alvin N. Garcia; Alayon-Nacionalista (NP) Party pinaagi sa presidente niini nga si  Talisay City Mayor Gerald Anthony “Samsam” Gullas; ug KAABAG Party pinaagi sa presidente niini nga si , Lapu-Lapu City Mayor Junard Chan, lakip sa namirma.

Mao pa kini ang unang higayon nga dunay lokal nga partido sa dakbayan sa Sugbu nga nipasilong sa partido politika sa probinsiya sa Sugbu.

Hinuon, iyaan sa kasamtangang presidente sa KUSUG ang gobernadora, basin og adunay maayong padulngan ang pakig-alyansa niiini.

Apan kana kun makadaog ang ilang mga kandidato sa umaabot nga piniliay. Latasunon pa kaayo ni.

Hinuon sab makita man nga maayo ang ‘chemistry’ sa probinsya ug sa Cebu City sa paglingkod isip acting mayor ni Raymond Garcia, sugod sa pagpahigayon sa Palarong Pambansa 2024 ug ang Pasigarbo sa Sugbu.

Dili lang si Garcia ang nitapon, hasta sab ang kaniadto sakop sa Bando Osmeña Pundok Kauswagan (BOPK) nga si Cebu City North District Representative Cutie del Mar nipasilong sab sa One Cebu.

Pagkatinuod, nindot baya pud paminawon nga magkahiusa gyud, probinsya man ug kining mga dagkong mga siyudad sa tibuok isla sa Sugbu sa tanang hisgutanan aron mas kusog ug lanog ang tingog sa mga Sugbuanon.

Ang Sugbu kanunay panguyaban sa mga kandidato sa mga nasudnong posisyon tungod sa nagkahiusang hunahuna sa mga tawo, dili lang tungod sa ilang mga lider, ang mga Sugbuanon mismo.