Lang-og nga mga sekreto
Dako ang papel ni Senador Bong Go sa pagtipig sa mga sekreto nilang Koronel Royina Garma kanhi Presidente Rodrigo Duterte ug sa Philippine Chartity Sweepstakes Office (PCSO). Nga nabisto sa imbestigasyon sa House Quad Committee:
Nikumpisal si Garma nga nakadiretso siya sa pag-adto ni Duterte sa Malakanyang bisan unsang orasa nga wala mananghid ni bisan kinsa gawas ni Go;
* * *
Gipasa ni Duterte ngadto ni Go si kanhi Cebu City Mayor Tommy Osmeña nga niadto sa Malakanyang kay nakadawat sa report sa PCSO niadtong 2018 nga nihingalan ni Garma nga nakadawat og usa ka milyon ka pesos kada semana gikan sa illegal gambling dihang mao pay hepe sa Criminal Investigation and Detection Group (CIDG) sa Central Visayas (gipamugos gihapon sa Malakanyang si Garma isip hepe sa Cebu City Police Office (CCPO) bisan sa pagsupak ni Osmeña);
Giangkon ni Garma nga si Go ang gihatagan sa iyang aplikasyon sa pagka general manager sa PCSO niadtong 2019 bisan dili bakante ang puwesto niadtong higayona ug 10 ka tuig sa dili pa mo-retiro sa Philippine National Police (PNP);
* * *
Gibutyag ni Garma nga gipasaligan siya ni Go nga mao nay moatiman sa iyang aplikasyon ug si kanhi Presidente ang nipahibawo nga mo-asumir na siya sa PCSO ug busa kinahanglang mo-retiro sa PNP; ug
Human gipatay si PCSO Board Secretary, Retired Police General ug Atty. Wesley Barayuga, niadtong 2020, si Go ang gisultihan ni kanni PCSO Chairperson Anselmo Simeon Pinili, classmate sa biktima sa Philippine Military Academy (PMA) Matikas Class sa 1983 ug maoy nagtudlo niya sa PCSO, nga nakaila na sila kinsay utok ug mga responsable sa krimen.
* * *
Ang ka-kahibulongan sa papel ni Go sa relasyon nilang Duterte ug Garma ug sa mga panghitabo sa PCSO kalabwan lang sa makabungog niyang pagpakahilom sa kasayuran nga gitagoan:
Walay tubag si Go sa sumbong ni Osmeña (human sa usa ka tuig gitudlo hinuon ni Duterte si Garma sa ahensiya nga namasangil niya og krimen);
Hilom si Go sa nisunod nga upat ka tuig sa sumbong ni Pinili nga si Garma ang nagpapatay ni Barayuga; ug
Segurong dili motubag kon pangutan-on sa quad-committee parte sa gitipigang mga sekreto.
* * *
- Latest
