EDITORYAL - Gusto sab moserbisyo

Kagahapong adlawa ang unang adlaw sa pagduso og certificates of candidacies (COCs) sa mga nagtinguhang modagan sa umaabot nga piniliay sa sunod tuig.

Dili lang mga naandang mga personalidad ug politiko ang nakit-ang miduso og kandidatora sa mga buhatan sa Comelec. Dunay mga drayber, gwardiya, magtutudlo ug ordinaryong mga molupyo.

Ang ilang gidaganan, pagka-senador, duna say gustong mag-konsehal, mag-mayor, mag-gobernador ug kongresista.

Dili kabiay-biayan ang ilang rason kun nganong sila nangahas pagkandidato, tingali nakita nila unsay wala nga hiyas sa mga kasamtangang lider nga sa ilang tan-aw naa kanila ug mas makamao silang mobuhat niini para sa kaayohan sa tanan.

Apan sa tan-aw sa kadaghanan, unsa may nakaon aning mga tawhana nga nakahunahuna man sa pagdagan o pagkandidato? Unsa may ilang mabuhat para sa katawhan?

Daghan dayon ang nagduda sa ilang abilidad ug kapabilidad. Hinuon, gibase ra sab kini sa mga nagkomento sa ilang nakita sa miduso sa COC.

Dunay uban nga halangdon ug talahuron ang pamarog ug murag dunay ikasarang, apan duna say uban nga ordinaryo ra kaayo ug simple lang ang plataporma nga tungod sa kasimple wala na makita sa mga beteranong mga politiko, apan diay to maoy gipangita sa katawhan.

Hinuon, ubos sa balaod, si bisan kinsa nga lumad nga Pilipino, makamaong mobasa ug mosuwat, pwede kaayong modagan og posisyon basta sakto pa sa edad. Ingon niana lang kasayon ang rekisitos.

Ang Comelec na maoy bahalang motan-aw kun tugotan ba kaning maong mga tawhana nga mopadayon sa ilang kandidatora  o ideklarar silang nuisance candidates.

Hinuon dili man sab porke dili ilado ang kandidato otomatiko dayung ideklarar nga nuisance candidate.

Kay duna nay desisyon sa Korte Suprema bahin niini niadtong tuig 2022 nga diin gikorihian sa korte ang Comelec nga di tanang “wa-el” o wala elhi dili kayang molansar ug mokampanya.

Ang importante lang nga patas ug makatarunganon ug paspas ang paghimo og desisyon sa Comelec sa dili pa magprinta og mga balota.