EDITORYAL - Oportunidad gikan sa Japan

Ang Pilipinas usa ka maritime nation tungod kay nalibutan kini og kadagatan. Apan nganong ang Pilipinas bisan ikaupat sa dunay pinakadakong shipbuilding industry sa tibuok kalibutan, gikinahanglan mang sa laing nasud magpahimo ug mga barko para sa Armadong Kusog ug sa coastguard niini?

Ang mga barkong gipahimo diha sa Tsuneishi Heavy Industries ug sa Austal sa Balamban ug sa kaniadto nanirado na nga Hanjin Heavy Industries sa Subic, dili mga barkong panggubat kondili mga barkong ang gamit para sa sibilyan o komersyo.

Angay masayran sa tanan, dili kwestyon ang ug gidak-onsa barko kondili ang mga sensitibong ipangmuntar sa mga barkong panggubat nga wala dinhi sa Pilipinas.

Ang pagka sensitibo niini nagkinahanglan og pagtugot ug dakong pagsalig sa mga gobiyerno sa mga nasud diin kini gihimo tungod sa seguridad.

Apan si kanhi Japanese Defense Minister Onodera Itsunori sa interbyu kaniya sa NHK didto sa Japan, dako kini nga oportunidad sa Japan ug sa Pilipinas kun ang duha magsosyo sa pagpanghimo og barko dinhi sa nasud.

Si Itsunori namahayag nga pwede kaayong sa Pilipinas nila ipahimo ang mga barko sa ilang coastguard ug uban pa. Kun mahitabo kini, dako ang purohan nga dinhi sab sa Pilipinas mamalit og mga barko para sa ilang coastguards ang ubang mga nasud tungod sa ang teknolohiya sa mga Hapon.  Ang Japan karon nagatubang og krisis sa ilang populasyon tungod kay  mas daghan ang senior citizens itandi sa ilang mga batan-on. Mograbe pa gyud kini sa mosunod pang mga katuigan, gani sa pagkakaron migamay na ang ilang work force maong nagsalig na sila sa mga robot. Epekto kini sa birth control sa mga Hapon sa nanglabay nga mga henerasyon kay dili sila gustong magkaanak tungod sa gastos ug responsibilidad sa pamilya. Apan dinhi sa Pilipinas dako ang populasyon ug dakong pahat niini naa sa working age, kaso lang kuwang sa namuhonan para momugna og daghang trabaho.

Karon mas milig-on pa ang relasyon sa Pilipinas ug sa Japan  human nagpinirmahay sa Reciprocal Access Agreement nga may pagka-parehas sa Mutual Defense Treaty tali sa Amerika. Mas modaghan ang oportunidad nga dili dapat usikan sa mga Pilipino ug dapat kining hangupon.