Yulo kaduha gipaawit atong Nasudnong Awit
Nasundan sa among pamilya, pinaagi sa YouTube channel ang pagpakigsangka sa atong pambatong gymnast, Carlos ‘Caloy’ Yulo, batok sa mga hinashasang atleta sa nagkalainlaing nasud sa gipahigayong 2024 Olympic Games didto sa Bercy Arena, Paris. Diin nahisulod siya sa mga finalist sa Men’s Floor Exercise ug Gymnastic Men’s Vault
Sa Men’s Floor Exercise namatikdan, nga dihang si Caloy nay mi-perform, migahob ang abiba-pinalakpakay gikan sa mga nanan-away nga mipuno sa Bercy Arena. Nagpasabot ba kini nga si Caloy maoy ‘Darling of the crowd?’
Hasta kami mora'g natakdan. Moapil paghiyak among tiyan inig lupad-balitokbalitok niya sa itaas. Pulos nag-ampo nga mahimong perfect iyang paglanding sa canvass. Unya, maglumbag siyagit og ‘Yes!’ kon daw posteng mipilit ang pagtugpa ni Caloy sa ubos. Pero kon mahairog og paabante o paatras, dali pod ming makayawit: “Ayayyy!”
Misamot among kakulba dihang ipakita na ang iskor ni Caloy sa screen. Ug nahasiyagit mi sa kaalegre dihang 15.000 points iyang nakuha. Sanglit nalabwan man niya ang mga nahaunang kaparang. Apan among kakuyaw-kahinam nagpadayon. Kay may mga nahabilin pa bayang kakompetensiya. Hangtod nga dihang duruha na lamay nahabiling kontra, medyo relaks na mig diyotay. At least, seguradong maka-bronze na ang Pilipinas. Ug kon suwetihon?
Milusot sa among bentana ang kalanog sa among pagmaya dihang si Caloy gyoy nakapunggit sa gold. Diin, nakakahilak siya ug nahapungko tungod sa dili masabot niyang gibati human nakab-ot ang kinatas-ang bantayog sa prestihiyosong World Olympic Games. Diin, taliwala sa ekonomikanhon-politikanhong krisis nga atong giatubang, may Caloy pang nakahatag og dakong garbo sa Pilipinas.
Pagka Agosto 4, 2024, atubangan sa napunong arena, mipupo na usab og gold medal si Caloy sa Men’s Gymnastic Vault competition. Busa sa ikaduhang higayon, giwarawara na pod atoang Philippine flag, giisa sa itaas ug solong gipatugtog ang atong Nasudnong Awit, timaan nga kini giyukboan sa tibuok kalibotan. Pagkalalim paminawon. Maka-proud!
Unta, magahinan sa gobiyerno og igong pundo atong mga atleta sa tanang matang sa sports. Buwahan, sa ilang pagka-saha, may magamit sila diha sa ilang pagtubo hangtod sa paglambo ug mamahimong laing Yulo sa mga umaabot Olympics.
Ug makamtan lamang kini kon hingpit isalikway sa atong kagamhanan ang korapsiyon.
- Latest
