Panid-an gyud nato

Pagkadaghang kaso nga angay natong tutokan pag-ayo kada adlaw, aron masayod kita kon unsay mga kalamboan niini.

Una, ang pagkasikop na sa nangangkon “Son of God” nga si Pastor Apollo Quiboloy, ikaduha ang pagkasikop sa gi-dismiss nga mayor sa Bamban, Tarlac nga usa diay ka pyur nga Intsik ug nalambigit pa gyud sa ilegal nga POGO didto sa ilang dapit.

Ang laing mga isyu mao ang pagdala balik sa Pilipinas sa kanhi kongresista sa Negros Oriental nga gitumbok nga mastermind sa pagpatay ni kanhi Governador Roel Degamo.

Ug ang ikaupat, mao ang paglambigit sa mga dagkong opisyal sa kapolisan niadtong mga “extra-judicial killings” atol sa administrasyon ni kanhi Presidente Duterte.

Dayon, ang kabahin sa politika nga wa nay maayong pagtinagdanay sila si Presidente Bongbong Marcos ug Vice President Sara Duterte, ug naa pay isyu kabahin sa pagpanghasi kanato sa mga Intsik may labot sa West Philippine Sea.

Kabahin sa kaso ni Quiboloy, angay natong tutokan kon tinud-on ba ni Bongbong ang iyang giingon nga way special treatment nga ihatag sa pangulo sa Kingdom of Jesus Christ.

Para nako, angay gyud nga ipakita nga patas ang hustisya, ug dili hatagan og special treatment ang mga tawo nga atong gihisgotan.

Bahin ni Quiboloy, dili sayon ang mga pasangil nga iyang gipang-abusohan ang pipila ka gwapa niyang mga babayeng sakop ug mao nga gikiha siya og sexual assault.

Dili ra kay dinhi sa Pilipinas nga si Quiboloy nag-atubang ug susama nga mga kaso, kondili, didto sa hukmanan sa Estados Unidos nag-atubang sab si Quiboloy og kasong sexual assault. Apan yuna pa, duna pa diay laing kaso nga angay natong tutokan og dili kalimtan. Nakalimot na ba mo sa pangulo sa usa ka kulto didto sa Surigao nga gipasanginlan sab nga miabuso sa mga sakop niini nga babaye?

Kadto ba nga nagpatawag og Senior Agila ngadto sa iyang mga sakop. Naunsa na kaha karon ang kaso nga gipasaka batok sa mga opisyal sa mao nga kahugpongan?

Sagdi lang, dinhi sa Renbor Patrol, dili nato kalimtang ang paghatag kaninyo sa mga kalamboan niining mao nga mga kaso.

* * *

Kinsa ba kadtong wa pa makaparehistro sa Comelec? Sa mga lumolupyo dinhi sa Cebu City, adto lang mo sa SM City ug pagdala'g valid government-issued ID.

Ang Comelec nagbutang og mga kawani sa SM City Mall aron nga sayon ra sila nga makaserbisyo, kay kon sa ilang opisina maghuot man.

Gawas sa pagparehistro, mousab ang Comelec sa mga ginagmay’ng sayop sa nga’n, apan pagdala gyud mo og birth certificate gikan sa Philippine Statistics Authority. Kon ipausab ninyo ang status, gikan sa pagka single ngadto sa married, dad-a ang inyong marriage certificate. Ang deadline sa pagpangrehistro Septembre 30.