EDITORYAL — Politika sa Mandaue

Duna gyuy dakong kausaban ug makutaw karon ang politika sa Mandaue City karong giingon nga gikanselar gyud sa Commission on Election (Comelec) Second Division ang Certificate of Candidacy (COC) ni  kanhi mayor Jonas Cortes tungod sa kasong administratiba nga gipasaka kaniya.

Hinuon duna pay pamaaging legal nga pwedeng buhaton ang kampo ni Cortes, duna pa siyay apelar sa korte bahin sa maong kaso. Ug kun dili man siya paboran, mahimo siyang modangop sa Korte Suprema, ang bugtong tighubad ug tigpasabot sa mga balaod sa nasud kun kini nagsubay ba gyud sa Konstitusyon.

Apan bisan pa man niining tsansang balihon sa Korte Suprema ang desisyon sa Comelec kun dunay nalapas sa katungod ni Cortes, makadisturbo kini sa gihimong pagpangandam sa ilang kampo sa umaabot nga kampanya para sa mid-term elections sa 2025. Ang iyang kaso may kalabotan sa matud pa misrepresentation sa usa sa mga isyu diha sa siyudad, ug siya gihukman sa Ombudsman nga taktakon sa serbisyo ug gipahamtangan og perpetual disqualification to hold government position.

Kaning nahitabo kang Cortes posible sab nga mahitabo sab sa ubang mga local chief executives nga gipang-dismiss sa serbisyo sa Ombudsman tungod gihapon sa nagkadaiya nilang mga kasong administratiba.

Ang Comelec daan ng nipahibalo nga bugtong makapahunong sa diskwalipikasyon sa certificates of candidacies sa mga opisyal nga napahamtangan og dismissal ug perpetual disqualification mao korte sama sa pagkuha og temporary restraining order.

Daghan ang miisa ang kilay aning hitaboa, ilabi na sa mga supporters ni Cortes. Nagduda gyud sila nga dunay mga gamhanang mga kamot nga maoy nagpadagan niini ngadto sa kaulohan aron dili na makadagan pag-usab si Cortes sa sunod tuig. Tungod aning mga kasong gipang-atubang sa mga nagkadaiyang local chief executives, mahimo unta kining leksyon sa uban.

Kay mura gyud sila og bibingka kun sila nay makalingkod sa pwesto, naa gyuy dili makauyon sa ilang mga polisiya ug mga pagabuhaton , tinarong pa na o inabusar.