Mitahan na

Mitahan ngadto sa pangulo sa intelligence service sa armadong kusog sa nasud ang pinangita sa balaud nga pangulo sa Kingdom of Jesus Christ (KOJC) nga si Pastor Apollo Quiboloy. Kini human sa pila ka semana nga pagpangita kaniya sa kapolisan sulod sa 30 ka ektaryang compound sa KOJC aron ipatuman ang warrant of arrest batok sa Pastor.

Sa wala pa motahan giingon sa kapolisan nga anaa nagtago sa bunker ilawom sa yuta sa compound ang Pastor. Busa gamit ang metal detector nga makahibawo bisan sa pinitik sa kasingkasing sa tawo gikutkot sa mga polis ang yuta sa compound nga mao pod ang hinungdan sa pagreklamo sa mga sakop sa KOJC ug sa ilang abogado.

Maayo kay nakapaminsar na ang pastor ug mihukom sa sa pagtahan sa iyang kaugalingon kay kun wala pa siya mitahan posible nga mahurot og kutkot sa kapolisan ang yuta sa compound sa KOJC.

Motahan man lang diay, nganong nagpapangita pa man ang oastor ug gipaabot pa niini nga kutkoton sa mga polis ang yuta sa ilang compound.

Kun mitahan pa unta dayon si Pastor Quiboloy ngadto sa kapolisan dihang iyang nasayran nga i-serve na kaniya ang iyang warrant of arrest daghan pa unta seguro ang motuo sa iyang pangangkon nga inosente siya sa mga kaso nga gipasaka batok kaniya.

Hinuon magpasalamat lang ko nga mura og naminaw si Pastor Quiboloy ug iyang abogado nga si Toreon sa akong panawagan nga motahan ug itahan sa abogado ang iyang kleyente nga nagtago.

Niadtong Domingo sa akong programa nga Bullseye akong gisugyot ni Atty. Toreon nga iyang agnihon ang iyang kleyente nga motahan nalang ug atubangon ang mga kaso nga iyang giatubang kay makakuha man siya og daghang mga maayong laki nga abogado nga manalipod kaniya. Ako kining gisugyot anang pagkabuntag ug mitahan si Quiboloy nianang pagkahapon. Ambot og natayming lang ba kaha mitahan si Quiboloy human sa akong sugyot kaniya ug sa iyang abogado nga motahan.

Sa laing bahin, mora'g walay makakuha sa napulo ka milyon ka pesos nga gipatong sa iyang ulo.