EDITORYAL - Gihimong hukmanan ang socmed

Inahan sa Paris Olympics double-gold medalist Carlos Yulo gikuninitan og mga pagsaway sa mga netizens diha sa social media ug gihinganlan kini og daghang makaguba sa dungog nga mga pulong.

Ang inahan ni Yulo nga si Angelica gisaway og maayo tungod sa iyang post sa social media nga nipadayag sa iyang pagbati ngadto sa anak nga dili normal sa usa ka inahan kansang anak nakadaog mga bulawang medalya sa labing dakong kompetisyon sa paugnat sa kusog sa kalibotan. Kun sabton og maayo, lawom ang mga pamahayag sa inahan ni Yulo kun tinuod gyud kining gikan kaniya ug siya maoy nag-post.

Apan ang nakabati, dali kining gisakyan ug gihubad sa mga netizens basi sa ilang kaugalingong opinyon, kadaghan, pulos personal dalang kayugot ngadto sa inahan sa atleta.

Dunay mga nanggawas nga balitang giingong may kalambigitan kini sa karelasyon karon ni Yulo nga Filipina-Australiannga giingong wala mauyoni sa inahan kay mao kini ang hinungdan kun nganong nagkabuwag iyang anak ug ang dugay na kaayo niining Japanese coach sa wala pa ang 2023 World Championship.

Kaning tanan pulos ra mga estorya ug wala gyud madungog gikan sa mga baba mismo sa mga hingtungdan. Busa dili husto nga tuohan dayon.

Salamat nalang hinuon kay bisan pa sa giagiang mga pagsuway diha sa iyang pamilya tungatunga sa iyang preparasyon, malampusong nakuha ni Yulo ang duha ka bulawang medalya para sa nasud.

Sa kasikas sa social media, nigawas nga ang iyang inahan kontrabida samtang si Yulo ang dinaog-daog ug bugtong ang iyang amahan lang ug uyab maoy nagpangga kaniya.

Kinaiya na sa mga Pilipino nga molaban sa mga dinaugdaog ug nakuha kini karon ni Yulo gikan sa mga netizens. Apan di makatarunganon nga hukman ug tamayon og ingon niini ang inahan ni Yulo. Duna gyuy bug-at ug balidong rason (kun tinuod man kining iyang mga gi-post), nganong iyaha kining gihimo.

 Wala man sab tungloha sa inahan ang anak, igo ra niyang gipadayag ang iyang gibati ngadto sa anak diha sa iyang post.

Ang mga netizens lang maoy paspas kaayong nakahukom ug nagbuot-buot paghimo og opinyon, sagad dili maayo, batok sa inahan sa atleta.