State of Health Emergency sa dengue

Hilabihan ang pagburot karon sa kaso sa Dengue nga maoy hinungdan sa ubang mga lokal nga kagamhanan sama sa lalawigan sa Bohol nga nagdeklarar na og dengue outbreak ug gipaubos na usab sa state of calamity ang probinsya aron makahimo pa sila og mas epektibong lakang batok sa mga lamok nga nagdala sa naasoyng balatian.

Sa dakbayan sa Sugbo usab girekomendar sa Cebu City Health Department nga ideklarar sa LGU ang state of public health emergency kay perting taasa ang gisaka sa kaso sa dengue nga niabot na sa dol-an 600 ka kaso gikan sa Enero ning tuiga hangtud sa kasamtangang buwan itandi sa kapin 20 ka kaso sa tibook tuig sa 2024, mokapin sa 2,000% ang pagsaka sa kaso.

Miabot na usab sa walo ang kompirmadong namatay ug usa ang suspected dengue death itandi sa nakalabayng tuig nga zero death ang Cebu City. Nagpasabot lang kini nga grabe na kaayo ang pagkatap sa dengue sa syudad nga kinahanglan og kongkretong aksyon.

Unsa man ang kalahian sa outbreak ug health emergency? Mao na akong pangutana nilang Acting Mayor Raymond Alvin Garcia ug Dr. Daisy Villa ang pangulo sa CCHD ug wala kaayo sila mohatag og categorical answer apan masabtan na nato nga pareho ra man kini. Basin nanagana sila nga kong mogamit og outbreak makamugna og panic o ba kaha dautang imahen sa syudad. Kong tan-awon mas alarming ang "state of public health emergency" kay naay hadlok ug kulba factor murag martian law.

Bisan unsay ilang gamiton nga pulong ang importante nga makalihok na dayon nga sama sa giyera seryosohon ang gubat batok sa dengue, mas maayo gani makamugna kini og kahadlok sa mga tawo aron magpakabana kay sa tinood lang walay pakialam ang mga tawo karon gi-take for granted ang pag atiman sa palibot nga gisalig nalang ang tanan sa guberno

Admitido ang LGU nga dili nila kaya ang pagsolbad sa problema nagkinahanglan sila sa katawhan nga mahimong sundalo sa gubat karon batok sa balatian aron seguradong magmadaugon sa pagpilde sa kabangis sa mga lamok nga nagdala sa mangtas nga balatian.

Dili lang ang Bohol, dakbayan sa Sugbo kon dili tanang mga LGU ug ang katawhan magkahiusa aron mapugngan ug mapanalipdan ang kinabuhi sa tanan kay walay pili kining mga lamok nga mopaak bisan kinsa. Panalipdan nato ang usah usa.