Nataymingan lang si Tsip!

Naatlan lang gyud si P/Col. Antonietto Cañete sa mga dagkong panghitabo sa dakbayan sa Sugbo sa iyang pag-asumer sa pwesto isip acting Cebu City Police Office Director ug ang labing dako mao ang nahitabong pagpatay sa usa ka saleslady nga si Charina Relativo sa Barangay Bulacao, Cebu City niadtong nakalabay’ng Biyernes kansang lawas napalgan nga hubo ug gisunog pa gyud ang buhok niini sulod sa giabangan nga balay.

Hinuon dali ra kaayong nasulbad ang kaso dungan sa pagkasikop sa usa ka lalaking silingan sa biktima nga si Darren Cui kinsa miangkon sa iyang giluwatan nga extrajudicial confession nga nahinakyan niya sa pagtuok ang biktima nga misangpot sa hinanaling kamatayon niini.

Una matud pa niyang gitinguha nga hilabtan ang pagkababaye niini apan dihang misukol maong iyang natuok ug namatay, tungod kay dakog lawas ang suspek murag manok ra nga gituok ang ang biktima.

Gisuwayan pa niya og sunog ang biktima aron pagtago sa krimen nga iyang gihimo apan ang buhok ra ang nasunog. Nadakpan siya atol sa gipahigayon nga operasyon sa mga otoridad ug napasakaan na og mga tukmang kaso sa krimen nga iyang gihimo.

Mipadayag sa iyang pagdayeg si Cebu City Acting Mayor Raymond Alvin Garcia sa dali nga pagsulbad sa krimen apan sa samang higayon dunay mga pagduha duha si Garcia kong makahimo ba gyud si Canete sa pagmintinar sa kahapsay ug kalinaw ilabi na nga sa wala pa mahitabo ang murder case sa Bulacao aduna nay unang mga pagpamusil nga nahitabo sa dakbayan.

Atol sa press conference, ginawong og ingon ni Garcia si Canete nga posibleng mailisan pa niya kini isip hepe sa kapolisan sanglit wala pa man siya makapili kong kinsa gyud ang himoong director sa Cebu City Police Office kay nagpaabot pa man siya sa listahan gikan sa Police Regional Office diin adunay lima ka mga pangalan ang iyang pagapilian apil na si Canete.

 In fairness, abtik ug aktibo si Col. Cañete sa mga programa nga iyang gipatuman karon sa dakbayan, gani mangunay kini sa pagbisita sa mga estasyonan sa kapolisan aron masusi ang kahimtang sa mga dapit nga covered sa ilang area of jurisdiction. Transparent usab kini nga mahimo ra nga mahinabi sa mga sakop sa media ug spontaneous motubag kay nasayod man usab siya sa iyang gihimo kay usa man usab siya ka abogado.

Sayo pa kaayo hukman ang katakos ni Canete, unta mahatagan siya og kahigayonan nga mas mapamatud-an niya ang iyang programa nga crime prevention pinaagi sa pagpahugot sa police visibility ilabi na sa mga dapit nga peligro sa kinabuhi sa mga tawo kay adunay mga dautang tawo nga nagpaabot lang og higayon nga makapamiktima.

Hinuon sa kinaiya usab ni Acting Mayor Garcia mohatag kini og dakong tsansa sa mga opisyal nga makapamatuod sa ilang katakos. Gani dihang miasumer siya sa katungdanan wala man niya pamulihi ang mga tawo nga anaa sa position kinsa nakahatag og maayong serbisyo sa katawhan.