Legal separation

Dear Atty. Divine,

Ang asawa sa akong igsuon nagplano daw nga mopasaka og legal separation. Iyang gipadad-an og text message ang akong igsuon ug matud pa sa iyang mensahe buwag na daw sila.

Wa silay anak ug ang asawa sa akong igsuon wa na mouli sa ilang pinuy-anan ug tua na mipuyo sa iyang mga ginikanan.

Medyo nagkaproblema sila tungod sa utang kay kining akong igsuon sugarol ug nagsige lang og pangutang para isugal.

Ang akong pangutana kun mamahimo bang kabasihan sa legal separation ang utang? Unsa may kalainan sa legal separation sa annulment of marriage? Daghang salamat.

Dear Lucy,

* * *

Kining legal separation, usa kini sa remedy sa magtiayon nga nagkaproblema sa ilang kaminyuon. Kun ma-aprobahan kini sa korte, gitugutan ang magtiayon nga magpuyo separately apan dili sila makaminyo pag-usab tungod kay pabilin pa man silang minyo sa usa’g usa.

Sukwahi kini sa annulment of marriage nga kun ma grant sa korte, nabugto na gyud ang kaminyuon sa magtiayon busa mamahimo silang makaminyo pag usab.

Samtang kalabot sa grounds sa Legal Separation, nalatid kini sa Article 55 sa atong Family Code ug ang utang wa maapil nga basihan sa pagpasaka og legal separation. Thank you and God bless.

Atty. Divine

* * *

Alang sa inyong pangutana, ipadala  lang sa pag email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.