Hustisya dili pamolitika
Wala nay duda. Kon moluwat og arrest warrants ang International Criminal Court (ICC), ang administrasyon ni Presidente Ferdinand Marcos Jr. mosugot na nga dakpon ug maneguro nga madakpan silang kanhi Presidente Rodrigo Duterte ug ubang mga sinumbong sa laktod nga pinatyanay sa kampanya sa drugas.
Ang pangutana na lang kon kanus-a luwatan. O kon naluwatan na man kanus-a ipatuman. Klaro na kinsa ang mopatuman: Ang Philippine National Police (PNP), nga obligadong mopatuman sa red notice sa International Criminal Police Organization (Interpol), aron dili kapasanginlan si Presidente Marcos Jr. nga nibalitok.
* * *
Nilubad ang administrasyon–gikan sa hingpit nga pagdupa sa mga Duterte ngadto sa paglawog nila sa tirong–tungod sa pagkabuak sa ilang alyansa. Nahimong mas dinalian para sa Malakanyang ang panginahanglan sa paghipos sa kanhi presidente kay:
• Nangampanya ang mga Duterte sa pagpalagpot ni Marcos Jr. aron makapuli sa palasyo si Bise Presidente Sara Duterte Carpio; ug
• Kinahanglang inutilon ang kampanya sa kampo sa mga Duterte lokal ug nasudnong eleksiyon sa Mayo 12, 2025 aron mas mapalig-on ang pagkontrolar sa administrasyon sa Senado, House of Representatives ug local government units (LGUs).
* * *
Nga dili maayong balita para sa mga tagtungod sa mga biktima sa kabangis sa mga Duterte. Kay kon lunlon pamolitika ang rason, mas paspas nga molikoy ang mga Marcos:
• Mahimong barawon na sab nila ang ICC kon motila sa ilang lapalapa ang mga Duterte ug mosaad nga dili na lang mangambisyon sa 2028 ug adto na lang magtikaw-tikaw sa Davao; ug
• Mahimong isunod pagpahilom ang tinuod nga puwersa sa politikanhong oposisyon kon magapos nang mga Duterte.
* * *
Bisan sa lapad nga pagsupak gipamugos sa Malakanyang ang gikabalak-ang kahimanan sa lapad nga kawat: Ang Maharlika Investment Fund ug ang pagkuha sa P89.9 bilyones nga pundo sa Philippine Health Insurance Corporation (PhilHealth). Ang isog rang pagbarug sa nagkalainlaing sektor ang nakabaraw sa laktod untang pag-usab sa 1987 Constitution.
Maong karon pa lang awhagon nang Malakanyang nga tabangan ang ICC dili aron pagpalambo sa ilang pamolitika kon dili aron paghatag og hustisya sa mga biktima sa laktod nga pinatyanay. Sa ingon mapahinumdoman ang mga Marcos nga dili motugot ang katawhan nga mangopya sa ilang amahan sa pagpilit sa gahom.
* * *
- Latest
