Ayaw pailad

Ako, diriyot gyud ko mailad, pero abtik gyud ko, nakaagi gud og investigative course mao nga wa gyud mailad.

Ingon niini ang estorya. Tigtan-aw ko og mga vlogs, ilabi na ang mga hilig kaayo motabang sa angay’ng tabangan. So, akong gi-follow si “John Millionaire.”

Tighatag ni siya og tabang, sa mga nanginahanglan. Two days after ko mi-follow sa Page ni John Millionaire, nakadawat ko og friend request sa FB gikan sa usa ka John millionaire.

Nalipay ko, kay sikat gud nga vlogger, ug ako dayon nga gi-accept. Karong gabhiona, July 10, 2024, mi-chait nako si John millionaire. Matud niya “Good day friend, how are you doing friend.”

Mi-reply ko ug nagpaila nga I’m in the Philippines ug nag-anchor og radio program ug pirmi ko motan-aw sa iyang mga upload.

Ingon dayon siya “Okey friend, I want to make a little test of you, can I.” Gitubag nako nga yes. Tuod man, gipadad-an ko niya og picture sa usa ka batang babaye nga naghigda nga mora’g di man sa ospital.

Matud niya nga masakiton kaayo ang maong bata, pero akong tan-aw, gwapa man gani kaayo ang bata nga pangedaron tingali siyete-anyos.

Tua kuno sa US ang bata. Akong giingnan nga wa na ko’y trabaho, apan pero makatabang ko sa maong bata pero gamay ra. Matud ni John millionaire nga ang doktor nga nag-atiman sa bata dunay Gcash, adto kuno nako i-send ang tabang.

Dinhi na nagsugod ang akong investigative skills. Gisukna ko niya kon ready na ba ko nga mo-send sa kwarta nga itabang nako sa bata.

Wa dayon ko mo-reply kay nagsugod na ko pag-imbestigar. Gi-click nako ang iyang ngan nga John millionaire sa FB aron sutaon kon pila ang iyang followers. Sus, dili man ma-click!

Gi-search nako ang John Millionaire page nga sagad nako tan-awon, ug duna kini 3.4 million followers. Nagsugod na ko sa pagduda.

Nakatuon man ko kon unsaon pag-ila ang fake nga mga accounts, ug mga page, mao nga nagpahiyom ko nga nagtan-aw kay ang iyang “John millionaire” nga gustong tabangan nako ang bata, small letter ang M.

Giingnan nako siya nga nagduda na ko niya nga fake siya nga John Millionaire. Matud niya “Come on Friend” ug nag-send siya og ID nga dunay hulagway ni John Millionaire, giisyu ni gikan sa Mexico kuno.

Nabasa nako sa Page ni John Millionaire nga daghang bogus nga page nga migamit sa iyang ngan. Giingnan nako ang nakig-chat nako nga gamiton niya ang “John Millionaire” nga Capital M?

Diha-diha gi-unfriend ko. Hahahahaha. Kay di man gyud siya maka-chat nako nga mogamit sa “John Millionaire” nga Capital M, kay di man ma-register sa FB kay naa na may naggamit.