Bar DJ gipusil patay

CEBU, Philippines — Patay ang DJ sa usa ka bar human giulo pagpusil sa wala pa mailhing suspetsado pasado alas-3 sa kaadlawon kagahapon, Sabado, Abril 20 diha sa General Maxilom Avenue atubangan sa usa ka bar ug disco house sa Barangay Cogon Ramos, Siyudad sa Sugbo.

Ang biktima mao si Junrey Garces Jimeno, 27, DJ sa usa ka bar ug residente sa MacArthur, Barangay Tinago, Siyudad sa Sugbo.

Sa impormasyon sa Abellana Police Station 2 pinangulohan ni Major Mark Don Alfred Leanza sa ilang pag-abot nag-ubo ug naligo sa kaugalingong dugo sa dalan ang biktima.

Base sa inisyal nga imbestigasyon sa kapulisan ang biktima kuyog ang katrabaho niini nigawas sa bar nga ilang gitrabahoan.

Niinsister matud pa ang biktima nga maoy mokuha sa motor sa iyang kauban nga naka park sa usa ka fast food chain sa Barangay Cogon Ramos.

Sigon pa sa katrabaho sa biktima nga samtang nagsunod siya sa biktima nga mokuha motorsiklo kalit mibutho ang mamumuno nga nagsul-ob og black t-shirt ug nagsakay og motorsiklo.

Sa wala'y daghang pangutana kalit niini nga gipusil ang biktima nga naigo sa ulo nga maoy rason sa iyang hinanaling kamatayon.  Dali sab kini miikyas paingon sa General Avenue, Cebu City.

Ang pamilya sa namatay nihulagway niini nga buotan ang biktima og walay kontra apan ang amahan nagtuo nga basin naselosan ang iyang anak.

Ang amahan nga si Reynaldo Jimeno, niawhag sa mamumuno nga wala man sila makaila niini nga motahan nalang sa gihimo niini sa iyang bugtong nga anak nga lalaki sa iyang upat ka mga bata.

Padayon sab ang hot pursuit operation sa kapulisan sa suspek sa krimen samtang palawman nila ilang imbestigasyon aron masuta ang motibo sa krimen.-- Rowena Capistrano, IBM BANAT NEWS