Sekreto ni Don Sergio
Kanhi gobernador sa Sugbo nihagit sa pipila ka sakop sa media sa Sugbo nga nagkatapok sa Kapitolyo daghang katuigan nang nilabay sa pagtabang sa tahas nga gisangon sa iyang kaugalingon sukad sa iya pang kabatan-on: Pagpangita sa gitagoan nga mga dokumento nga nagbisto sa di maayong mga binuhatan ni Don Sergio Osmeña Sr.
Nipasangil siya nga ang gipabilin nga mga sinuwat, nga mao ray nabasahan sa mga Sugboanon, mao ang mga testimoniya sa iyang kabantogan, kalantip sa panghunahuna, talagsaong liderato, kamapaubsanon, kamakiangayon ug pagka tinuod nga higanteng Sugboanon.
* * *
Amo siyang gipangutana kon unsay atraso ni Don Sergio o sa mga Osmeña niya. Nipadayag siya og kamapasalamaton sa mga Osmeña. Nga maoy nakapahimutang niya ug sa mga sakop sa iyang pamilya sa importanteng mga puwesto sa gobiyerno.
Nipasabot nga gusto lang niyang mahibaw-an sa mga Sugboanon ang hingpit nga kamatuoran sa ilang mga lider. Nga silang Don Sergio ug kaubanan di mga anghel. Malaumon siya nga kon mahibaw-an ang ilang kahuyangan, puno sa nabaniog na nilang kalamposan, makahatag og mga pagtulon-an sa pagsagubang sa umaabot nga mga pagsuway.
* * *
Nipasidaan siya nga maglisod mi kon mosanong sa iyang hagit. Kay nakaplagan nga bisan ang mga kaso sa korte parte ni Don Sergio ug sa iyang yuta ug ubang kabtangan lisod nang igkita.
Namatay siya nga wa ming kahibawo unsay nahitabo sa kawsa. Nahisgutan ni nako human nakabasa sa sinuwat nga mahimong makapatagbaw niya: Pagtuon ni Dr. Resil Mojares, National Artist for Literature, sa papel ni Don Sergio sa rebolusyon batok sa mga Katsila ug mga Amerikano.
* * *
Matud ni Mojares samtang nagtrabaho sa Cebu Audiencia sa 1896:
• Ang 18 anyos nga si Don Sergio nisuwat og mga artikulo sa El Boletin de Cebu nga nagkondenar sa mga Katipunero sa Luzon;
• Iyang sinuwat sa El Comercio sa Manila (Disyembre 17, 1896) nitunglo sa “itom nga kamabudhion” sa “ingrato nga mga anak” ug niawhag sa Espanya “pagpapas sa mga bastardo;” ug
• Nahimo siyang sinaligan ni Gobernador Celestino Fernandez Tejeiro nga nipasidungog niya sa Medalla de Merito Civil (kinatas-ang madawat sa mga sibilyan) sa Pebrero 23, 1898, lima ka buwan sa wa pang gubat sa Tres de Abril.
* * *
- Latest
