Nag-alintabo nga kalibog
Kon gituman pa lang sa Department of Education (DepEd) ug local government units (LGUs) ang ilang trabaho, di unta magkaguliyang ang public schools sa way klarong mga lagda pagsuspenso sa klase. Gani, kon gituman pa lang ang ilang saad, wa unta kinahanglana ang pagsuspenso sa klase tungod sa El Niño.
Dihang nipasidaan ang Pagasa sa Hulyo sa niaging tuig sa grabeng pagtaas sa temperatura, ang DepEd ug LGUs nipasalig nga andam sila. Ang problema mao nga gawas sa pasalig way nahimo nga bisan unsang pangandam sa niaging siyam ka buwan.
* * *
Wa lang gihapoy bintana ug dugang lutsanan sa hangin ang kasagaran sa classrooms. Wa gihapoy kisame. Limitado gihapon ang mga bentilador (ang gidaghanon nag-agad lang sa kamanggihatagon sa mga ginikanan). Nagsobra gihapon sa kapasidad ang gidaghanon sa mga estudyante.
Mao nga dihang nisulbong ang temperatura sa Marso ug Abril karong tuiga, ang kainit gikan sa atop nisilab sa mga bata ug mga magtutudlo, nga gilikosan sa hangin nga makapaso bisan sa mga bentilador, maong ang pagpaka aron ingnon sa pagsabot sa mga leksiyon maoy unang nilayas sa classrooms.
* * *
Imbes mauwaw sa kapakyas pagpabugnaw ug pagpaluag sa classrooms, ang DepEd ug LGUs nag-iyahay og himo og mga lagda pagsuspenso sa mga klase (dunay usa ka semana, dunay usa ka buwan, dunay indefinite ug dunay niusab lang sa schedule).
Way plano unsaon pagsawo ang mga bata. Kay way budget pagprinta ug pag-apud-apod og modules. Labaw nang way load para online classes. Maong kasagaran sa mga bata nakabuylo og duwa sa gawas bisan sa, nakatag-an ka, grabeng kainit.
* * *
Human gitugyan ang gahom pagsuspenso sa klase ngadto sa mga eskuylahan, ang DepEd nisuspenso sa klase sa public schools sa tibuok nasud sugod niadtong Lunes. Ang rason? Di ang kainit. Kon dili aron matiwas ang assignments sa mga estudyante ug mga magtutudlo.
Gawas nga wa matarung pagpasabot ang suspenso, wa say katin-awan ang sugo sa DepEd nga mobalik ang klase ugma, Huwebes. Bisan nahinayak nang LGUs sa mas taas nga suspenso hangtod molurang ang kainit (nga segun sa Pagasa unya pa sa Hunyo). Salamat sa kataphaw sa DepEd ug LGUs, mga estudyante maoy kinadak-an og pilde.
* * *
- Latest
