Abuso sa mga PUJ

Dili na maihap ang reklamo nga akong nadunggan labot sa mga abusadong drayber sa mga public utility vehicles. Gawas niini dili na sab maihap sa tudlo ang mga higayon nga personal nakong nasinati ang abuso sa mga kaskasirong drayber og PUJ modern PUJ ug traditional.

Di pa dugay nag-viral sa social media ang reklamo sa usa ka pasahero nga nakiglalis sa konduktor sa modern PUJ tungod sa overloading. Mireklamo ang pasahero tungod kay bisan naghuot na sila sa tunga padayon gihapon sa pagpasakay og pasahero ang konduktor ug moinsister gyud nga idasok ang bag-ong misakay nga pasahero bisan wa nay kabutangan.

Dihang mireklamo ang pasahero nasuko ang konduktor ug arogante kini nga miingon nga iyang pakanaugon ang pasahero nga mireklamo. Ang pagpasakay og pasahero sobra sa  seating capacity  sa usa ka PUV hugot nga gidili ug kalapasan sa lagda sa transportasyon.

Apan bisan sa tataw nga mga paglapas gipasagdan ni sa mga tigpatuman sa lagda sa trapiko tungod kay dili igo ang gidaghanon sa atong mga PUV. Bisan naghuot ang mga pasahero nga nagbarug tunga sa mga modernong PUJ way gihimo ang mga tinugyanan sa trapiko pagbadlong niini. Wa say mga sakop sa Land Transportation Franchising and Regulatory Board nga mipitol nila bisan sa dayag nga kalapasan.

Ambot hangtud kanus-a pasagdan sa mga hingtungdang ahensiya sa kagamhanan ang dayag nga paglapas sa mga drayber og modernong PUJ sa mga lagda sa transportasyon. Unsay kapuslanan nga atong giilisan kunohay og moderno nga mga PUJ ang tradisyonal nga mga jeepney apan wa mosunod sa modernong pamaagi ang batasan ug kinaiya sa mga drayber ug konduktor.

Nalipay ta nga hamugaway, limpiyo ug bugnaw na unta ang mga modernong unit sa PUJ apan dili masinati sa mga pasahero ang kausaban kun maghuot lang gihapon sila tungod sa overloading. Gawas pa labihan ka delikado niini alang sa mga sumasakay.

Hinaut molihok na ang mga hingtungdang ahensiya ug di paabuton nga dunay di maayo nga hitabo usa sila mokihol.