Sama sila og mga tawo

Kini ang giingon kanako sa akong higala nga dunay kandingan. Matud pa niya nga kun mahimo kinahangang hamugaway ang pinuy-anan aron sa ingon mamahimong mas nindot ang resulta niini kun maghisgot kita og pagpamuhi.  Nakaingon ko nga bisan ang hayop kinahanglang atimanon maingon nga ang tawo kinahanglan usab atimanon. Ingon ini gyud kun maghisgot na kita og pagpakabana ingon man pakigrelasyon.

Niadtong bata pa ako, natahasan akong mag-atiman og mga kanding. Gani duna koy mga napulo ka mga kanding kaniadto diin ako lang ang bugtong nag-atiman. Hinuon wala kaayo koy igong alamag kun unsaon ang akong naandan kaniadto mao raman ang pagkuha, hatud og tubig ug paghatag og pagkaon.

Gani ang pagdala kanila ngadto sa ilang tugwayanan usa naman ka dakong ritwal matag adlaw samtang dili pa ako moadto sa akong tunghaan ug gikan sa tunghaan akong guyoron ang mga kanding nako padulong sa amo. Kaniadto kaningon ko nga walay kuyaw kay walay kawatan kaayo kaniadto. Ang matag silingan magpakabana gyud sa imong kabtangan ug andam silang manalipod niini.

Ang kanding ingon nga hayop ang nagkinahanglan usab og igong pagtagad dili tungod  kay makahatag sila kanato og gatas o dili ba kaha karne kondili tungod kay mahinungdanong kabahin sila sa atong kinabuhi ning kalibutan sa kalambigitan ug ning uniberso sa kukabildo.

Ang pag-atiman sa usa ka hayop sa hinayhinay nga paagi usa man ka pagpadayag sa atong tinguha nga atong lipangon ang atong pagkamapailubon. Dili lang sa mga hayop kondili hasta na usab sa mga tanom. Mao kini ang nakanindot sa mga tawo kaniadto taas sila og pailob tungod kay maantigo silang magpaabot.

Nahigmata ako sa kamatuoran nga ang kinabuhi diay usa ka dakong proseso. Nagpasabot kini og pagpaabot sa tukmang panahon ug takna segun sa gilatid nga balaud sa kinaiyahan. Ang pagdali dali usahay maoy nakaaghat sa pagsulod sa daghang kapakyasan. Mga kapakyasan nga mahimong magpaubos sa paagi nga gilantaw nato ang atong kaugalingon.

Gani ang uban nato nagtuo man nga mamahimo kitang taas segun sa resulta sa atong tagsatagsa ka mga obra o lihok. Nahikalimot kita nga ang atong bili anaa ra gyud diay mismo sa atong kaugalingong pagkatawo ug wala sa bisan unsang komentaryo sa ubang mga tawo.

Gibati ko og tumang kabalaka sa dihang nasayran ko nga ang akong kanding nga si Karen dili na ganahang mokaon. Busa wala ko  maglangay ako dayong gipatawag ang vet gikan sa lungsod aron sa ingon mahatagan og igong tambal ug aksiyon ang kahimtang ni Karen nga sa dili pa  lang dugay nanganak na.