EDITORYAL - Pangalan sa pasyente ipublikar

Usa ka maayong kalamboan kining bag-ong kamandoan nga gipagawas sa Inter-Agency Task Force on Emerging Infectious Diseases kagahapon sa buntag adlaw nga Domingo nga ipublikar na ang mga pangalan niadtong pasyenteng magpositibo sa novel coronavirus disease 2019 (COVID-19).

Ang tumong niini mao nga mas mapadali ang contact-tracing niadtong mga tawong posibleng nakauban sa maong mga pasyente. Pinaagi niini, mas paspas silang mabuwag dayon sa kadaghanan ug mamenusan nga modaghan pa ang mataptan sa maong virus.

Hinuon kinahanglan gihapong mag-amping ang publiko pagpakatap sa mga impormasyon kabahin sa mga pasyente ilabi na kun dili kini gikan sa opisyal nga pamahayag sa gitahasang ahensya sa gobiyerno.

Tungod kay usahay, kining wala sa lugar nga “pagpakabana” sa uban mao man hinuoy nakapadugang sa kahadlok sa katawhan tungatunga niining maong katalagman.

Si Cabinet Secretary Karlo Nograles, kinsa mao sab ang tigpamaba sa task force  mosulod ang Department of Health ug ang Office of Civil Defense sa us aka kasabotan alang sa data-sharing.

Kun nganong karon lang kini nahunahunaan sa task force, sila ray nasayod sa eksplinasyon. Apan kaniadto pa adunay balaod nga Republic Act No. 10173 o Data Privacy Act nga nagdili sa pagpublikar sa mga pangalan sa mga pasyente ilabi na kun ang ilang sakit magbutang sa peligro sa kinabuhi sa kinabag-an.

Lakip sa posibleng rason mao ang paglikay nga mag-panic ang publiko kun mahibaw-an nilang ang ilang silingan nagdala niini nga virus ug magkagubot na hinuon, labaw sa tanan, malikayan sab ang wala sa lugar ug dili makatawhanong diskriminasyon ngadto sa mga gidudahan palang ug sa mga nataptan na gyud sa maong virus. Hinuon dili kini basta lang ipagawas ang impormasyon tungod kay kinahanglang may pagtugot kini gikan sa pasyente. Kun motugot siyang ipublikar ang iyang pangalan way malapas nga katungod sa pasyente.

Apan sa gihapon, kinahanglang mainampingon ang pagpublikar tungod kay walay tawong gustong matakboyan sa maong sakit.