Illegal parking

Kanindot kun tinud-on nga i-clamp na g’yud sa City Traffic Operations Management (CITOM) kadtong mga sakyanan nga masakpan nga anha ra i-parking daplin sa mga karsada sa gabii ngadto na sa kaadlawon.

Dugay na kaayo ko nga miawhag niini nga kinahanglang kampanyahan g’yud sa mga tinugyanan sa balaod kini’ng mao nga tinonto sa mga tag-iya og sakyanan nga anha ra pakatulga ang ilang “units” sa karsada nga makabalda kaayo sa ubang motorista.

Ang katawhan angay’ng magpakabana g’yud kay ang gihimo niini’ng mga tawo nga nanag-iya og sakyanan nga anha ra i-parking sa karsada, makahasol kun ang mga bomber moresponde og sunog, o kaha ambulansya panahon sa emerhensya.

Dili g’yud maayo ang gihimo niini’ng mao nga mga tag-iya og sakyanan, ilabi na kun ang sakyanan mga public utility vehicles sama sa passenger jeepneys, cargo trucks, taxi ug uban pa nga sakyanan’g pasaheroan.

Base sa lagda, ang mga public utility vehicles sa dili pa hatagan og prangkisa sa Land Transportation Franchising and Regulatory Board (LTFRB), kinahanglan nga ang tag-iya adunay grahe alang sa iyang mga sakyanan.

Daghan kaayo nga tag-iya’g mga public utility vehicles nga ang ilang sakyanan anha ra g’yud sa karsada i-parking. Abi ninyo og ngano? Walay parking area kini’ng mao nga mga operators kay nangilad ra sila sa pag-apply nila og prangkisa.

Gikatakda nga sugod karong gabii paspasan na sa pag-clamp sa CITOM ang mga sakyanan nga ilang masakpan nga anaa ra sa karsada i-parking. Usa ka libo ka pesos ang multa sa mga tag-iya sa mga sakyanan nga masakpan sa CITOM.

Awhag lang nako ni CITOM operations chief Joy Tumulak ug CITOM Executive Officer Rafael Christopher Yap nga kanunayon g’yud ninyo ang paghimo og kampanya dili kay “off and on.”

Usahay ra ba makabantay ko nga ang kampanya sa CITOM maayo lang sa pagsugod apan sa pagpanglabay sa mga adlaw makalimtan na lang.

Kagahapon sa buntag, gipahibalo ko sa radio operator sa CITOM nga 72 ka tag-iya’g sakyanan ang giisyuhan nila og warning kay nasakpan nga ang ilang sakyanan diha ra gibutang sa karsada ug tingali walay kaugalingong grahe.

Swerte kay nahukman sa CITOM nga warning pa lang ang ilang gihimo kaniadtong miaging gabii, apan karong gabii, estrikto na g’yud kuno nga i-clamp ang mga sakyanan nga masakpan nga anaa ra sa karsada giparking.

Angay lang nga hugtan ang paghimo’g kampanya batok niini’ng mao nga mga tag-iya’g sakyanan nga naghasol-hasol sa kadaghanan’g katawhan.