Sugbo isip tagoanan
Lisod ang pagsusi tinuod bang pagduda sa militanteng mga pundok nga gi-negosyo sa militar ang dagkong kuwarta nga gipatong sa mga ulo sa kadagkoan sa Communist Party of the Philippines (CPP), sa armadong bukton, ang New People's Army (NPA) ug sa politikanhong bukton, ang National Democratic Front (NDF).
Tungod sa mga lagda sa seguridad di mapugos ang militar pagpaila sa mga nitultol nila sa nahimutangan nilang Benito ug Wilma Tiamzon ug kaubanan. Labaw nang di mapugos ang mga saksi sa pagmatuod nga nadawat gyud nila ang P11.2 milyones nga premyo. Kining lalisa mahimong mahisama sa daghan nang nangaging mga lalis tali sa mga sundawo ug mga rebelde--way kahumanan.
* * *
Gawas nga di obligado paghingan sa ilang mga saksi, ang militar makapang-intriga pa gyud sa pagpangangkon nga sakop ra sab sa NPA ang niunay sa magtiayong Tiamzon. Pagmatuod sa linya sa ilang propaganda nga ang mga rebelde, sukwahi sa gipatuo nga nagtamod sa ilang ideyolohiya, madani diay gihapon og kuwarta.
Makadason sab ni sa pasangil nga hingpit nang nagkatibuwaag ang mga rebeldeng komunista, nga ang mga sakop sayon rang mobukubuko sa labing dagko nilang mga opisyal. Mao nga ang kadagkoan sa Armadong Kusog, nga wa madungog sa ilang diplomasiya, makapagawal sa dakong ganti nga ilang nadaog atol sa makasaysayanong anibersaryo sa mga rebelde.
* * *
Di hinuon tinuod nga nagkatibuwaag ang mga rebeldeng komunista. Sa wa pa ug bisan human sa pagkasikop nilang Tiamzon ug kaubanan. Ambot kapila na nangangkon ang militar ug kapolisan nga nabungkag na nila ang NPA apan gisumbalik dayon og pagpangatake sa ilang mga kampo ug mga presinto nga nakapa-uwaw pag-ayo sa gobiyerno.
Nasobrahan ra hinuon ang pag-insistir sa kadagkoan sa CPP-NPA-NDF nga di ma-inutil ang ilang kahugpongan kay daghang takos nga makapuli sa mga Tiamzon. Dihang nakamatngon sa ilang sayop, nidalidali og paapas si NDF chairman Luis Jalandoni nga dakong kapildehan sa ilang kawsa ang pagkasikop sa magtiayong Benito ug Wilma.
* * *
Kun tinuod ang pangangkon sa mga silingan sa giingong safehouse sa Sangat, San Fernando, habagatang Sugbo nga Enero 2013 pa namuyo silang Tiamzon, di makapanghambog ang militar ug kapolisan sa Sugbo nga naabtan sila og 14 ka buwan una nakabantay sa presensiya sa dagkong haligi sa CPP sa ilang nataran. Sukwahi hinuon sa pangangkon ni CPP chairman Jose Ma. Sison nga nanganhi silang Tiamzon aron pagtabang sa mga biktima sa bagyong Yolanda.
Mahibaw-an sa mosunod nga mga adlaw nganong Sugbo maoy gitagoan sa mga Tiamzon. Apan pasiunang nahibaw-an nga sama sa kasarangang katawhan nalingaw sa ilang binuhing mga iro ug iring. Ug nga mas dako ang bay sa magtiayon kay sa ilang kaubanan nga gipapuyo sa silingang mga payag. Way kalainan sa ilang gisaway nga mga agawong yutaan.
- Latest
