Luag nga seguridad

Human sa dakong kalamposan sa Sinulog 2013, nakugang ang Sugbo sa usa ka dugoong panghitabo diin usa ka Canadian national namusil sulod mismo sa Palasyo de hustisya sa Sugbo.

Tulo intaw’n ang namatay apil na niini ang mamumuno nga si John Pope. Ang mga biktima intawn ni Pope usa ka doktor ug ang abogado niini. Lakip na pud usab ang usa ka piskal nga nagpabilin pa karon sa usa ka pribadong tambalanan aron magpaalim sa iyang samad pinusilan.

Nasuta sa imbestigasyon sa atong kapulisan nga lu-ag ra kaayo ang seguridad nga gipatuman sa Palace of Justice. Gani sa dihang giukay ang butang sa maong langyaw duna pa'y nakitang usa pa ka armas sa iyang bag. Sa ato pa duha ka armas de fuego ang nakalusot sa maong edipisyo.

Ang inyong kabomberohan pinaagi sa among Emergncy Medical Service maoy unang nakaabot sa maong lugar ug gani among personnel ang nagkuha ni Mr. Pope ug gisakay sa among abulansya.

Matud pa sa among kauban dakong buhi pa si Pope samtang anaa sulod sa sakyanan apan naglisod na kini ug matud pa makabsan ra gyud daw sa kinabuhi ang maong langyaw. Ug wa gyud sila masayop kay sa ilang pag-abot sa tambalanan diin nila kini gidala nakabsan gyud kini sa iyang gininhawa.

Unsa man kahay leksyon nga atong makuha sa maong panghitabo? Dapat sigurohon gyud nato ang pagpatuman sa istrikto nga security measure sa matag buhatan mapribado man o sa gobyerno.

Karong panahona na uso naman ang walay habas nga pagpatay gamit ang armas de fuego, mas maayo siguro nga hingusgan sa atong kapolisan ug ubang ahensiya sa gobyerno ang paggukod sa mga naghupot og ilegal nga armas.

Sa pikas bahin, pormal nang gipagawas ang tema sa fire prevention month 2013 nga "Sunog at sakuna paghandaan, kalikasan ay pangalagaan nang matamasa ang pag-unlad ng bayan."

 Nagsentro gihapon kini sa pagpangandam sa sunog ug uban pang mga kalamidad aron hingpit nga luwas ang publiko kun moabot man gani kining mga kalamidad.

Gihatagan usab og pagtagad ang kinaiyahan nga kinahanglan atong ampingan aron usab atong matagamtam ang pag-asenso sa atong nasud.