Senior Citizens Night sa Lapulapu City

Alang sa umaabot nga pangilin sa Birhen sa Regla sa dakbayan sa Lapulapu, ang mga Senior Citizens ning dakbayan gihatagan og higayon nga makasalmot sa kasaulogan pinaagi sa pag-angkon og usa sa siyam ka gabii nga kalingawan, pangandam sa piyesta.

This early, matud ni Gumer Aro, OSCA Head, nagsugod na sila’g practice sa ila unyang ipasundayag sa Senior Citizens Night. Gipaabot ang usa unya ka mabulokong pasundayag sa mga senior citizens ning dakbayan. Garantisado ang hingpit nga kalingawan, nagkanayon si Gumer.

Ang kalihokan sa senior citizens week sa Lapulapu City, Oct. 1-8: a) Parade nga gisalmotan sa mokapin usa ka libo ka seniors, gikan sa GMC paingon sa Simbahan diin gisaulog ang Santos nga Misa; b) Free vaccination against flu ug pneumonia; c) Mga opisyales sa federation miduyog sa kasaulogan sa mga senior citizens sa isla sa Sta. Rosa, uban sa napulo ka barangay chapter organizations, diin gi-distribute usab sa DSWD ang monthly pension sa mga beneficiary sa isla; d) Culmination program and assembly sa mga chapter presidents didto sa OSCA building.

Samtang sa tulomanon Senior Citizens Hour sa dyRC, mitawag si Ruben Ares, presidente sa Catmon Chapter sa Federation of Senior Citizens, nagpahibawo sa mga kalihokan sa ilang chapter (ato da kining i-detalye sa Biyernes). Iya usab gipahibawo nga naka-avail na sila sa one percent nga share gikan sa lungsod. Maoy hinungdan nga sa ilang mga tigum ug ubang kalihokan, dili na intawon mag-BYOP ang mga senior citizens.

Ug … bag-o lang kong nahibawo nga lima na ang kapunongan sa mga senior citizens sa Guadalupe, lakip sa Federation nga gipangulohan ni Lindy Virtudaso. Ang bag-ong pundok, ginganlan Senior Citizens of Barangay Guadalupe Chapter, gipangulohan ni Carol L. Jerez, kauban sila si George V. Castellano, vice president; Regina C. Elemia, secretary ; Fe D. Villareal, asst. secretary; Timotea N. Tan, treasurer; Luzvisminda C. Salaber, asst. treasurer; Eliza C. Castellano, auditor; Lauro A. Salaber, Epefania Gabutan, PROs.

Ang regular nga tigum matag katapusang Biyernes sa bulan, ala una sa hapon, sa opisina sa mga senior citizens sa barangay. Ang mga presidente sa laing tulo ka pundok, sila si Val Olandria, Carmen Gabucan, ug Novo Brobio.

Ang lima ka grupo, adunay komon nga opisina, air conditioned, adunay tagsatagsa ka desk ang matang president nga gi-provide ni Kapitan Michael Gacasan. Sa ato pa, samtang nagkalainlain nga pundok, apan nagkahiusa gihapon.

Matud ni Carol, aduna na silay 200 ka lingkoranan alang sa kagamitan sa mga senior citizens, sa ato pa, dili na sila manghuwam sa barangay, ug lagmit ang barangay nay manghuwan kanila.

Sa giingon, the more associations, the merrier.