Sitoy kurog ni Wakee

Nagkarag-karag karon si Mayor Ade Sitoy sa lungsod sa Cordova tungod sa kandidatora ni Wakee Salud kinsa miduso sa iyang kandidatora sa pagka mayor sa nahisgutang lungsod. Kun imong basahon ang body language ni Mayor Sitoy makaingon ka nga nahadlok gyod siya ni Wakee Salud. Gani kun imo siyang pamation sa iyang mga giluwatang mga pulong murag nahadlok gyod siya. Gani naghisgot na siya’g mamamarang sa Cordova. Ambot og unsay naa sa huna-huna sa mayor? Nakahuna-huna ba kaha siya sa pagpabarang ni Wakee Salud?

Ang mga panghadlok ni Mayor Ade Sitoy ngadto sa boxing promoter nga si Wakee Salud wa gyod magsilbi. Ang iyang barang, contempt, citizens arrest ug prisohang giandam wa gyod magsilbi sa gahig ulo nga si Wakee Salud. Kay wala siya makadulot ni Wakee, ang mga abogado na usab sa naulahi ang iyang gipuntarya. Iya kuno kining patangtangan og lisensiya tungod sa pagtabang kang Salud nga makaduso sa iyang kandidatora bisan dili residente sa Cordova.

Naglibog ko kun nganong nagpakita og kahadlok si Mayor Ade Sitoy kang Wakee Salud nga unta migamot naman ang iyang pangalan sa lungsod sa Cordova. Kun maayo lang ang pagkadumala ni Mayor Ade Sitoy ang lungsod nga migamot na ang iyang pangalan dili seguro siya magpakita og kahadlok ngadto sa tawong mao pay pagtunob sa iyang teritoryo. Ang problema kun walay nahimo si Sitoy sa iyang pagka mayor sa lungsod sa Cordova kay na-busy sa ubang kalihukan? Dinhi mahadlok gyod siya ni Wakee Salud!

Pero kahibawo mo? Ang mga insik sa Cordova inig kakita nila sa pangalan ni Wakee Salud modayog ingon "Wa-Kee Salud" samtang ang ubang insik inig kabasa upod nila sa pangalang Adi Sitoy modiritso lang upod sa paglingo-lingo og moingon "Ah-di Sitoy".