Gisabotahe ang MVIC

Dihang gitukod ang Motor Vehicle Inspection Center (MVIC) sa Subangdaku, Mandaue City niadtong 2008, gipasalig sa kadagkoan sa Land Transportation Office (LTO) nga mahipos na ang kagang-kagang ug depektuso nga mga sakyanan. Nga gawas nga nakapahimutang sa peligro sa mga kinabuhi sa ubang mga motorista ug mga pasahero sa kadalanan, makapasamot pa gyod paggusbat sa kinaiyahan.

Lunlon kahinangop ang gipadayag sa mga Sugbuanon sa gipasigarbo nga labing modernong kahimanan nga mohiling sa roadworthiness sa mga sakyanan. Apan, hangtod karon, upat ka tuig na human natukod, way bisan usa sa gipasalig nga kapuslanan sa MVIC ang napuslan.

* * *

Tanang sakyanan—sa gobyerno, pribado o pamasahero man—kinahanglan nga inspeksiyunon sa MVIC. Wa gyod untay bisan usa nga makalusot. Kay masangit ang mga sakyanan sa tinuig nga paglab-as sa rehistrasyon kun way clearance gikan sa MVIC.

Apan nganong padayon mang nagbahas-bahas ang mga lungon sa kadalanan? Nganong wa man gihapon mabadlong ang tayaon, gubaon ug kabungkagon na nga mga sakyanan? Nganong nagpatuyang man gihapon ang dagkong mga sakyanan sa pagpabuhot og bantok kaayong anuos ngadto sa kinaiyahan? Nganong pinatuyangan man lang gihapon ang kahuot sa mga pasaherong nag-sinardinas sa PUJs?

* * *

Diriyot mi magtikuka pagkahibawo nga sukad pa sa sinugdanan nga wa kapusli ang modernong computer system ug kahimanan pagsusi sa smoke emission, brakes, speedometer, suspension ug uban pa. Kay samtang pulos bag-o ang mga makina, di online ang sistema. Gimanu-mano lang ang data pag-encode sa computer aron makuha ang kumpleto nga inspection findings.

Sa pasiunang pakisusi sa kadagkoan sa LTO, nahibaw-an nga way depekto ang internet connection ngadto sa ilang nasudnong database. Apan giputol ang linya gikan sa control room, nga mao untay sentro sa sistema, ngadto sa ubang kahimanan sa MVIC. Gisabotahe ba sa fixers? O gibinuangan gyod sa suppliers?

* * *

Bisan kinsay responsable, may abundang rason sa pag-inutil sa MVIC. Dako uyamot ang alkanse sa panudlanan sa kurakot nga mga opisyal ug mga kawani sa LTO field offices. Nga nidasig sa tag-iya sa sakyanan sa di na paghago pag-adto sa MVIC ug pagbayad na lang og P500. P90 ray mahimutang sa resibo, busa P410 ang ilang ginansiya sa matag usa sa 150 ka sakyanan ang mopalab-as sa ilang rehistrasyon matag adlaw sa matag LTO field office.

Ang kapin sa P60,000 nga matigom sa matag usa sa field offices sa LTO nga niapil ning nangalisbong raket mao tingali ang hinungdan nganong giinitan ang MVIC. Kinsa may nakabahin ning usa lang sa daghan uyamot nga mga raket sa LTO? Hinaot nga di ni maoy nakaaghat ni LTO 7 Regional Director Raul Aguilos pag-exempt gikan sa MVIC sa pribadong mga sakyanan sa Lapulapu ug Talisay.

* * *

Email: [email protected]