EDITORYAL - Ang ka paspas sa pag-uswag sa ekonomiya sa CV

Sa power point presentation sa mga opisyal sa National Economic Development Authority (NEDA)7 nga maoy kasamtangan usab nga mga opisyal sa Regional Development Council (RDC)7 di na kinahanglang iplastar pa dinhi sa Editoryal ang mga figure bahin sa kamauswagon sa dagan sa ekonomiya dinhi sa Central Visayas (CV).

Apan ang labing bulahan ning maong kalamboan sa upat ka mga lalawigan sa Rehiyon 7 mao ang Cebu.

Hinuon naglaraw   ang mga opisyal sa RDC nga   bahinan usab sa mga kalamboan ang Bohol, Negros Oriental ug Siquijor aron labing molipang pag-ayo ang ekonomiya dinhi sa CV.

Gani nasuta segun sa record sa NEDA ug RDC nga sa tibuok  nasud ang CV maoy ikaduha sa National Capital Region (NCR) kansang ekonomiya puwerting sutoya sa pagsulbong.

Busa angay kitang malipay niini tungod sa dakong pagtuo nga ang maong kalamboan di lamang alang sa mga negosyante kundi lakip usab unta sa mga trabahante.

Unya kun ingon niini ang kahimtang sa ekonomiya sa CV, komusta ang suhol sa mga pribadong kawani.

Sa kaanindot og dagan sa ekonomiya sa CV sumala sa gipasigarbong kamatuoran nga di malalis ug di matuis sa NEDA ug RDC, nasayud kaha niini ang mga opisyal sa Regional Tripartite Wages and Productivity Board (RTWPB)?

Kay naa man gud sa maong grupo ang yawe aron makaduyog sa kauswagan sa dagan sa ekonomiya ang mga trabahante.

Kay kun ang mga negosyante lang ang magbaguod pagpas-an sa ilang kadaghang kuwarta unya mosakuong sa kalisud sa panginabuhi ang mga trabahante, oi ka wa bayay maayong dungog sa CV niini, tungod kay di timbang ang maong kauswagan.

Ang adunahan labing modatu, samtang ang pobre labing mohay-ad sa kakabus ug mahug nga di balance ang dagan sa ekonomiya.

Busa angay baya tingale nga hinuktokan kini sa mga economic planner dinhi.