Humana g'yud tawon

Hay, sa katapusan nahuman na gayud ang karsada nga nagdugtong sa Guadalupe paingon sa Barangay Kalunasan. Mahimo na nga ang mga sakyanan anha moagi diha kadtong gikan sa Guadalupe paingon sa Lahug, ug kadtong gikan sa Lahug paingon sa Guadalupe.

Hinuon, matud ni Assistant City Engineer June Nadine Sison mora sa Oktubre 1 pa nila mapaagian sa mga sakyanan ang maong karsada kay pagahion pa nila pag-ayo ang semento.

Apan mga motorsiklo mahimo na nga moagi, aw ako gani miagi na man kagahapon sa gaan nako nga sakyanan. Kotse mahimo man tingali nga paagion na lang kay dili man g’yud na magsunod nga daghan kaayo.

Kadtong mga bug-at nga sakyanan dili pa hinoon angay’ng tugotan pag-agi sa maong karsada kay wala pa kaayo mauga ang semento. Maayo nga tan-awon sa atong mga city engineer kay dunay riprap nga wala mahuman sa pagtrabaho sa kontraktor ug maoy nakalaw-ay tan-awon.

Kun hingpit na nga maagian ang maong karsada, sigurado ko nga mominus ang problema sa trapiko sa Gorordo, Escario ug M. Velez kay kadtong ubang sakyanan nga gikan sa Lahug paingon sa Guadalupe anha na man moagi.

Ingon usab niini ang himoon sa mga sakyanan nga gikan sa Banawa, Guadalupe, Capitol nga mopaingon sa Lahug ug kanait nga mga barangay nga dili na moagi sa karsada palibot sa Kapitolyo.

* * *

Sa pagsuwat nako niining maong lindog kagahapon sa hapon, nagkuba-kuba ang akong dughan. Unsaon, ang akong internet connection sa Globe Telecom sige og kaputol, dugay ra ba mobalik.

Gikan ko nga mitambong sa turn-over sa road repair project gikan sa kontraktor ngadto na sa mga opisyal sa dakbayan kagahapon, mideritso ko og pauli diri sa akong balay dapit sa Marco Polo.

Pag-abot nako, naminghoy ko kay wala pa gihapon mobalik ang internet connection nako human kini maputol alas nueve pa sa buntag. Giteksan nako ang akong higala sa Globe ug mipasalig nga ilang ipasubay ang akong linya.

Taud-taud, diha tuod mibalik na ang akong connection, apan magputol-putol. Mao kini ang rason nga gikulbaan ko kanunay kay basin og maputol nga dili na mobalik, patay g’yud. Kapoy na man gud kaayo nga muadto pa sa opisina sa The Freeman aron magsuwat sa akong balita nga diri sa balay duna man ko’y akong opisina.

Hangyo nako sa kahigalaan nako sa Globe nga tagda tawon kanunay ang akong internet kay mahinungdanon kaayo kini kanako gikan pa sa buntag hangtud sa gabii.

Kun tingbayad na bitaw abtik kaayo nga motawag nato ang Globe kun malangan ka pagbayad. Mao nga isip bugti, atimana usab ninyo ang inyong katungdanan.