Run for freedom and democracy

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Nahimo na karon ang pagpasiugda og lumba dagan nga gipahinungod sa halandumon nga mga adlaw ug gitumong usab alang sa gitinguha nga kaayohan nga dili lang sa kahimsog sa panglawas kun sa pag-umol usab og maayong katilingban.

Niadtong miaging Biyernes Septiyembre 21 niining tuiga atong gisaulog ang pagdeklarar sa Martial law ni anhing presidente Ferdinand Marcos pinaagi sa Presidential Decree 1081 nga nakapaukay sa katawhang Pilipinhon. Ang maong deklarasyon sa presidente maoy naghatag dakong gahom sa atong kasundalohan ug gipangsikop ang mga politiko ug mga tigpaluyo nga mialkontra sa iyang administrasyon.

Sa unang mga adlaw sa pagpatuman sa balaod militar dinhi sa nasud maoy nasinati ang hilabihan nga kamingaw nga nakapadis-og sa kalamboan sa nasud kay nagtagotago na man ang mga mga oposisyon ug lider nga nakigharong sa administrasyon ni anhing Presidente Marcos.

Ang nasinati nga kamingaw sa palibot mao lamang kadto ang nagsilbing salimbong sa nagkalawom pa nga pag-alkontra sa pamunoan ni anhing Presidente Marcos kay sa hilom nagpadayon man ang nagtagotago nga mga lihok nga misangko gayod sa iyang pagkalagpot sa katungdanan dihang nahitabo ang EDSA rebolusyon nga giapilan sa katawhang Pilipinhon.

Daghan ang nag-ingon nga ang nahitabo nga rebolusyon maoy nagbalik sa kagawasan gikan sa pagpig-ot sa pangagamhanan ubos sa Martial Law ni anhing Presidente Marcos nga nakapaaghat usab sa pipila ka mga rebeldeng New People's sa hingpit na nga pagbalik sa sabakan sa kagamhanan. Sa gipasiugdahan nga "Balik Baril" program sa kagamhanan maoy nasinati nga daghan usab sa mga kanhi sakop sa NPA ang misanong ug mobalik na sa pagpuyo nga malinawon.

Apan subo lamang nga palandongon kay human sa ilang pagtahan daw napasagdan na lamang sa gobiyerno ang ilang kahimtang nga nag-antos sa kalisod sa panginabuhi nga maoy nakaaghat kang Anad Partylist Representative Pastor Alcover Jr. sa pagpasiugda og "Run for Freedom and Democracy'' karong adlawa Septiyembre 23 adlaw nga Domingo nga manukad sa Plaza Independencia sa dakbayan sa Sugbo sa paghandom sa kasumaran sa deklarasyon sa adlaw sa Martial Law ug ang salapi nga matigom niini gitumong usab sa pagtabang sa panginabuhi sa kanhi mga rebelde nga mibalik na sa sabakan sa gobiyerno.