Kadali gud nausab?

Karong dili na kandidato si Tony Cuenco, dili na nimo siya makontak ug dili na siya motubag.

Dihang wala pa siya mosibog sa iyang tinguha nga mag-kongresista sa south district sa dakbayan sa Sugbo, mao pa ang manawag sa media.

Wala ko makalimot nga diha’y higayon nga kahilantanon ko apan giimbitar g’yud ko niya sa iyang balay kay duna kuno siya’y nindot nga balita, scoop kuno para sa ako.

Kay media lagi ta, nadani ko sa iyang giingon nga “scoop” nga news. Ang termino nga “scoop” mao kana ang usa ka daku nga balita nga ikaw ra ang makakuha. Miadto tawon ko bisan luya ang lawas. Pastilan, ang gitunol niya nga media kit mao ra usab ang giapod-apod niya sa mga sakop sa media nga daan na nga nag-presscon sa buntag pa.

Apan sagdi lang kay tingali diha nga si Cuenco nahimo nga sakop sa media, usa ka radio announcer kaniadto, wala pa tingali mauso ang “scoop” mao nga wala siya masayud kun unsa ang tinuod nga kahulogan niini. Dihay higayon nga gihilantan gihapon ko, mitawag si Cuenco sa akong selpon. Bisan tua siya sa Jakarta, Indonesia mokomentaryo siya sa mga isyu. Apan karon nga wala na siya’y tinguha nga magkandidato, dili na nimo makontak.

Pastilan. Hangyoon nako ang duha niya ka anak nga sila si James ug Ronald kay pareho man sila nga akong higala nga tambagi ang inyong amahan nga dili kini maayo.

Maayo lang diay kun siya ang adunay tuyo sa media? Mokontak man gud unta ko kay nindot man g’yud nga ikahinabi siya kabahin sa pagsibog niya sa pagdagan pagka kongresista.

Tinuod dunay suwat nga giingong iyang gipirmahan, apan mas nindot man gayud nga madungog ang iyang tingog. Dili gayud ko gusto niining mga tawo nga maayo lang mogamit sa media kun sila ang nanginahanglan.

Daghang tawo nga ingon niini og batasan.

* * *

Ipatawag kuno ni City Engineer Kenneth Carmelita Enriquez ug Assistant City Engineer June Nadine Sison ang mga private contractors nga nakadaug sa proyekto sa pagpalawom sa atong kasapaan. Nabantayan man gud nako nga mora’g tinunto ning ilang gihimo. Ang ilang gipalawman mao ra ang kabahin sa sapa nga makita sa karsada. Gituyo tingali nila nga makit-an sila sa katawhan nga nagtrabaho.

Apan nganong wala man ninyo paladmi ug kuhai’g lapok ang sapa nga atua na sa unahan nga dili na maabut sa inyong gigamit nga backhoe? Nasayud ko nga ang gihimo diri sa Parian Creek nga duol sa The Freeman mao usab ang gihimo sa ubang contractor sa laing kasapaan. Giawhag nako kadtong mga namuyo sa daplin sa sapa nga tug-ani ko ninyo kun gipaladman ba sa mga private contractor ang kabahin sa sapa diha sa inyong lugar.

Unya, kamong mga engineer ug dili engineer apan sakop sa Department of Engineering and Public Works (DEPW), ayoha usab ninyo sa pagsuperbisar nga dili mabinuangan ang dakbayan.

Kun magduka-duka mo, sigurado nga makabayad ang dakbayan sa walay kapuslanan. Aw gawas kun apil mo sa bahin nga mopirma nga humana na bisan wala diay ayoha ang trabaho.

Isip reporter gud sa City Hall, usahay mangunay ko sa paghimo og inspection sa mga proyekto nga gipundohan og dakung budget sa dakbayan. Mao man gani nga nasakpan nako nga ang ubang mga kawani mangatulog ug magduwa lang og baraha atul sa oras nga tingtrabaho. Unsaon, kining ubang opisyal sa City Hall anha ra man magpuyo sa opisina nga bugnaw.