Ayaw na'g abuso bay uy!

Wala pirmahi ni Mayor Michael Rama ang ordinansa nga nagmugna sa College Scholarship Board sa dakbayan sa Sugbo tungod sa rason nga giapil isip sakop niini ang chairman sa Committee on Social Services sa City Council.

Makapanglingo-lingo ko niini kay sigurado man nga ang pag-veto ni Mayor Rama ibaliwala na usab sa mga sakop sa Konseho pinaagi sa pag-override sa iyang veto power. Ingna ko nga bakakon dili ba mao kini ang ilang himoon.

Ang rason ni Rama nga wala pirmahe ang ordinansa mao nga maisip nga “conflict of interest” kon si Konsehal Rodrigo Abellanosa molingkud sa Scholarship Board tungod kay tag-iya man siya og tunghaan. Si Abellanosa maoy tag-iya sa Asian College of Technology (ACT) nga nalakip sa accredited schools nga mahimong anha ang mga “scholars” motungha.

Ang ordinansa giaprobahan sa City Council bisan og gikwestyon kini sa tulo ka konsehal nga alalay ni Mayor Rama, sila si Edgardo Labella, Jose Daluz III ug Edu Rama. Ang tulo ka konsehal miingon nga kalapasan kini sa balaud.

Gikutlo sa tulo ka konsehal ang lagda nga gilatid sa Republic Act 6713 kon Code of Conduct and Ethical Standards for Public Officials and Employees nga ang gihimo nga pagtugot nga makalingkud sa Board si Konsehal Abellanosa kwestyonable na.

* * *

Isip reporter sa City Hall, ang akong baruganan mahitungod niining maong isyu mao nga pwede ra baya nga wala ang chairman sa Committee on Social Services dili iapil sa Board.

Ang chairman sa Committee on Education maoy angay nga molingkud og morepresentar sa konseho diha sa Board.

Apan kay gipugos man gayud sa Konseho pagbutang ang chairman sa Committee on Social Services diha sa Board, kun ako pa ni Konsehal Abellanosa dili siya molingkud.

Hinoon gipasalig ni Abellanosa nga dili siya mohimo og mga lakang aron mapaboran ang iyang tunghaan tungod sa pagkasakop niya sa Board. Na hala, kamo diha, unsay inyong baruganan niining maong isyu?

* * *

Nahukman ni Mayor Rama nga kunhoran ang suplay nga gasolina nga ihatag sa matag sakyanan sa City Hall ug sa mga barangay. Sagad sa mga sakyanan gigahinan og tag 300 litros.

Gitigum ni City Administrator Jose Marie Poblete ug Konsehal Joey Daluz ang mga kapitan kagahapon aron sila masayud sa bag-ong kamandoan sa mayor.

Ang rason niini mao nga naut-ot na ang P90 milyones nga gitagana alang sa fuel, kon krudo ug gasolina para sa mga sakyanan.

Buyno, ang 300 litros daghan na kaayo. Mao kini ang rason nga ang ubang giisyuhan og sakyanan sa City Hall pwerte makabordo-bordo sa ilang sakyanan paghatud sa ilang mga bata sa tunghaan nga wala na unta’y labut.

Mao kini ang gihimo sa kotse sa City Hall nga adunay plate number nga 329, pirmi nako makit-an nga maghatud sa mga bata ngadto sa lainlaing tunghaan. Diha pay usa ka higayon nga nakit-an nako nga mikuha na usab sa bata pagkahapon.

Duna koy hulagway niining maong sakyanan. Para dili kaayo mauwawan ang giisyuhan aning maong sakyanan, gituyo nako nga wala lang idiga ang tulo ka litra sa plate numbers.

Apan warning, kun sigi pa gani kini nga gamiton sa paghatud-kuha sa mga tinun-an, idiga na lang g’yud nako.